12/2/2016 (星期五) 年初五
旅程第三天：江之島、箱根﹗
在酒店睡了很好的一覺，拉開窗簾，大晴天﹗
短短留了一個晚上，
便收拾細軟Check out去~
今天要去尋貓~~~喵﹗
在這裏下榻一晚，便宜和近車站是重點，
這家確實並不昂貴，也鄰近藤沢站，
行幾步就有商場、商店、食肆，
四周環境也不嘈吵雜亂~
簡單別致，乾淨整潔，且服務甚佳，靚太落腳推介~
(適全冇乜所謂的倆小口子，有要求的家庭客也許覺得房間太細小)
FRESA INN@藤沢
對我來說，每次去到酒店附近第一樣要睇既係：
有冇便利店﹗
呢間的大堂側門，就直通旁邊的LAWSON~Yeah~~
好，正式去搭小田急出發，我地要去：江之島~~~﹗
雖然搭江之電也可以到，不過搭JR更快，
大約10mins定必抵達~
愛玩客的時間係好寶貴~
是日得果兩、三度，日本妹仲可以著短裙，欽敬欽敬~
凳都未坐暖就到，例牌影一輪相先出閘~
影到車站都冇晒人.......XD
好靚喎個站﹗
老公話：好出名架﹗
係咩？點出名呀？
(歡迎春節遊客幾隻字其實好礙眼)
由於去完江之島，我地會直接返新宿，
而呢度又有車直接返去，
所以唔會咁豬將兩日一夜的行李keep響酒店，
更加唔會將佢地拎埋入島爬山﹗
咁點呢？唔駛驚﹗
日本車站實有locker畀你擺野，
畀幾百Yen就可以質晒入去架喇~~~hoho~
呢d錢，係要花.....
搵番個站有咩特別，
原來，設計係以江之島的海底龍宮為藍本，在當地十分有名~
啊~~~就係咁。
走出車站是片大空地，一直往前走就看到跨海(河？)大橋~
第一眼望到對岸的建築物，
感覺好似停留咗響五、六、七十年代.....
橋的左邊，望到一列似係民居的大廈~
橋的右邊，就是江之島了~~~
不用轉車，用腳走十數分鐘就到~
橋的盡頭有旅遊服務中心，又有公廁，
沿住中心轉右行落隧道就對了~
出了隧道會看到一條大直路，直達江之島~
呢日我地 8am左右來到，未見人潮，感覺舒適~
就好似畀我地包咗個島咁威威 ~XDDD
天氣尚算不錯，但十分寒冷~
入口處有遊玩地圖看看~
回望走來的路，都好似幾遠~~
假象嚟姐~
來到這裏其實可以收埋你d旅遊書，
因為島仔唔大，行入中間的商店街一直往上走，
就是山上的乜宮乜宮同各個景點，去燈塔都係呢條路沒錯~
(不過行完商店街過埋鳥居，都可以向左走向右走，
向左走是正路，有神社、寺廟、商店等，多d野睇；
向右走是山路，行山看海咁啦)
入口旁邊有江之島天然溫泉~
唔知有幾多遊客有時間試呢？
經過將近 200年歷史(Wao!) 的青銅鳥居，開始進入參道商店街~
所有店舖都未開門，係十成未開﹗XD
想真正來食玩買的話，
留意店舖多數開11am啊~~
我地倒塔咁早來，純粹因為行程緊迫，
幸好景點係唔使等開門，行到去就有得睇~
斜路冇京都清水寺果邊咁斜 XD，唔算好長、唔太難行，
而且沿途有貓，可以多多留意~
即講即有~
旅遊書話個島d貓多過人，
唔覺喎....唔夠多喎.....XP
呢條路只係見到四隻，
或者d貓未瞓醒~XP
喵：huh？你邊位呀？
走啦，影咩呀影？收你錢吖嗱﹗呼哇~~~
嗯~~唔睬你呀，人來﹗同我趕佢兩個龍友走!!
係係係.......小人遵命~
有事要小人幫拖嗎老大？
啊你想影我老大呀嘛？不如你影果邊果隻啦，果隻免費~
講咩呀你？﹗你當我 PR呀？我未食早餐呀好躁底呀而家~喵喵喵...
咩事唧你地，嘈嘈閉，
人地用佢自己的方法嚟到江之島架﹗
想影個喵相姐，咪畀人影下囉~
大方d﹗
XDDD........
話時話，江之島唯一令我 (遊客)要時刻警戒的，
係有勁多電車單、私家車出入呢條又窄又斜的小路上，
實在很困擾，好難放鬆心情睇野看風景~
唔知晏d多咗遊客時，係咪咁既情況呢？
扶老攜幼前來者，要注意~
呢度的商店門外，都會掛上設計得好靚的燈~
感覺好一致，好和風，好古樸~
哇~~~放題!!! 好想試.....
好快就見到街尾的鳥居~
近住鳥居左手邊，見到呢間好出名，
好多人必食的即製巨型蝦餅店﹗
可惜當時未開門......
更慘情是，回程時再去，佢地話呢日唔開即製果邊，
下？點解啊嗚~~~~~
(↑↑↑ 唉....)
食唔到，冇得呃like.....XD
但我亦唔想買現成pack好果款，
其實咪即係脆脆蝦餅？大塊d咁解姐.....(自我開解)XP
好啦繼續行，入島目標：上燈塔~~~
過咗呢個紅色鳥居，
左邊有收費的登山扶手電梯可直接上山，
嫌腳骨力太多，亦可以選擇步行 (但好多樓梯架下!)
鳥居後的是參道盡頭的「瑞心門」，
因為江之島有很多龍的傳說，
很多景點都是模仿海底龍宮建造而成，
瑞心門兩旁就繪了唐獅子，屋頂還繪了牡丹~
其實都好中國feel~
穿過瑞心門，會有左右兩邊分叉路，
左邊睇野、右邊行山~
點解咁清楚？因為我地轉右行錯咗囉﹗XD
(打算用全日在島上玩的，當然可以慢慢行山)
無論搭電梯或行樓梯，都一樣去到同一個地方~
下圖右邊就係扶手電梯出口，
可以慳好多氣力........
(冇搭，好後悔，強力建議畀錢搭!!!!)
(網上圖片：齋睇電梯都覺得斜............何況樓梯 @@)
行得愈高，景觀愈美~
中津宮~
片野寫真館，老公話有貓相展覽，但未開~
沿途有好靚的地圖，清晰易睇~
方便望下自己行到咩位置~
終於見到燈塔 (江之島展望燈台)~~~
感動落淚~
唔去燈塔，可以轉左行，
同樣有好多景點，如龍戀之鐘、江之島岩屋等等~
一場來到，唔係唔上呀嘛？﹗XD
入口處旁邊有自助售票機~
淨係入公園 200Yen，上埋燈塔 500Yen (成人收費)~
喜歡浪漫的話，建議夜晚先來燈塔，
公園同燈塔都亮燈，靚超級多!!!!
(不過事前最好自己Update下資訊，
我地都係響車站睇到宣傳海報先知有情人節燈飾同燈光匯演，
其他日子不清楚~)
走馬看花地行了公園一圈，就直接上燈塔~
沿途沙地有貓在翻滾，引得日本一家四口玩到唔願走~
園內也有Cafe，用上貓裝飾~
公園盡頭就是燈塔入口~
要搭升降機上~
升降機入口左邊的樓梯，上一層係大平台，
可以拍到燈塔全景，
但研究咗一陣都唔知使唔使收費？(好似唔駛)
我地係行完燈塔再落去玩的~
等Lift~
(日本人拍拖係咪真係唔拖手架？)
上到去，有例牌收費望遠鏡使用~~
不過透過玻璃窗都一樣看到美景~
臨近情人節，燈塔上貼咗好多戀愛msg，
好浪漫架ne......(雖然唔識睇@@)
沙地隻滾地貓，仲未走﹗有又第二批人同佢玩緊了~XD
隔住玻璃影相唔盡興，反晒光噃~
咪傻豬豬，有樓梯直上頂層架嘛，
冒住寒風都要上去睇啦~~~~
抬頭見到燈塔個尖啄果下，竟然有點腳仔軟~
塔頂一望無際，影相果然更爽~~
360度，想點影就點影~~~
望著寧靜美麗的大海~~~感覺好Refresh~~~
好，凍僵咗喇，係時候返落去影全相~~
呢個平台明顯畀你攞靚位影紀念照~
OK，推介，來到必上~~
折返公園望多兩眼，決定去龍戀之鐘﹗
現在開始，要落山喇~
(地勢問題，唔係堅落番山 XD)
崖邊的小屋，感覺陡峭~
島上的「稚兒之淵」和「岩屋」其實都好值得去，
聽聞稚兒之淵，係來自《鎌倉物語》內的
一段投海殉情故事，
聞說當日呢度波濤洶湧、巨浪滔天，景象並不尋常......@@
好淒美的愛情故事啊~
上完山又落山，好多樓梯，
好彩冇行李~~(汗顏)
話口未完，落完樓梯又要上樓梯喇 XD
有可愛喵蹤 <3
其實好多貓都出現老態lu，
眼睛好像不太好~
貓奴興奮拍拍拍~~
想摸摸，未摸到就走咗~XD
呢個路口右邊有間美景餐廳，當時仲未開舖營業~
望入去，環境唔錯，如果有時間我應該會揀呢間試~
因為門口寫明有個台可以睇到無敵靚景，
邊睇邊食~~ (估佢係咁講.....XD)
行到十點幾，四周還是一片寧靜，早來有早來的好~
日本人真係好中意貓，好愛護貓~
我諗幾乎所有動物佢地都會善待 (但尤其係貓)
所以響日本街頭見到任何動物，
佢地都唔會怕人，感覺唔到攻擊性，
試過好幾次遊日時，路經門外綁住隻狗的民居，
都係唔會撲出嚟喪吠，兼且仲好溫馴友善~
(令我好想知道香港村屋d狗點解可以培養到咁兇猛....)
多點出遊、看多一點不同社會面貌，自行學習領會~
來多個關於貓咪的分享，
日本人由1987年起，就將每年 2月22日定為「貓之日」，
因為日文 2的發音，與貓咪叫聲十分相似。
而很多日本的寺院和神社內，都有供奉著貓，
日本文化學家直江廣治在《日本文化史詞典》內
關於貓的條目中寫道，
日本這種供奉「貓」的特殊現象，
已顯示出貓的地位已跨越了諸神之間。
日本由小說、動畫，以至卡通等，
都不乏貓咪的題材，
如赤川次郎的著作《三色貓》、
宮崎駿的動畫《貓之報恩》、
藤子 F 不二雄的漫畫 (卡通) 《叮噹》(多啦A夢)等......
我諗大家都會叮一聲咁話：係喎~ XD
唔講貓住，鏡頭嚟番龍宮先~~
龍宮都會落閘？
好，呢站主要目標是：龍戀之鐘﹗
本來諗住冇時間來，
但原來兩公婆都唔想錯過呢個位，
所以唯有急步走走走~~~
搵到去入口，見有工人整緊路，
以為維修唔入得，好失望~~~
好彩，我地望到有批日本登山阿叔阿嬸由呢條路行落嚟，
即係上到去啦﹗
唔理三七廿一，直接踩上去﹗真係上得，好彩冇放棄掉頭走唧﹗
莫名地好想來朝聖一下~~
我就冇帶鎖喇，
要一齊既，唔鎖都走唔甩~XD
面向大海，風景優美~~
仲有好高貴的椅子畀愛侶談心~
我老公就一個籮柚坐咗一張~XDD
龍戀之鐘有個極為浪漫的傳說，
很久很久以前，鎌倉某個深山裏面，
蟄伏咗一頭兇惡的五頭龍 (一頭定五頭？)
佢專係揀夜闌人靜時出來作惡.......拐走晒d細路食曬落肚當宵夜﹗(係鬼故嚟﹗)
所以d村民都買咗佢怕.....
有一日，有個爆索的仙女下凡拯救世人﹗
當仙女撥開雲霧降落人間時，
江之島就在大海中突然冒起~~~
五頭龍見到仙女果下即刻心心眼十分愛慕﹗
不過仙女就好唔like佢邪惡的本性，
為咗奪得芳心，五頭龍唯有改邪歸正，
佢地之後傾掂數一齊化成凡人，永永遠遠互相廝守~
為咗紀念呢個五頭龍冧仙女的愛情故事，
江之島的戀人之丘上就整咗呢個「龍戀之鐘」﹗
只要你同深愛的另一半，一齊走上江之島頂峰敲響呢個鐘，
你地就會永遠幸福地走在一起架喇~~
好明顯我老公係五頭龍，我係仙女~ XDDDDDDDDDD
好浪漫的一個故事 (害羞)
一齊敲果陣，記得拍埋片﹗我地有﹗我地真係有﹗XD
對住個鐘呢個位，仲整咗個可以擺手機自拍的設備﹗﹗
本人對此深表讚賞~~~
自拍大成功~~~
好滿足了~~
推介，情人要來看看~~
離開時有喵~~
沿路落番去，是時候回程了~~~
做日本貓真係好........悠閒到呢....又自由~
行番出大街，好香喎聞到~~~
個肚自動識叫~~~要醫一醫佢﹗
要咗兩款，即買即燒~~(翻熱)
炭燒好香啊~~~~
大大件，落足本~~
正當我地打算企埋一邊食果時，
婆婆就邀請我地入去小舖食﹗
好住家feel，好溫暖~~~
婆婆就繼續企響出面凍住擺賣~
外面得幾度，室內有個大暖爐，
一個小招待，真係令人好窩心~
呢間，大正軒，去到記得幫襯下勁Nice婆婆~~
我地行原路落山，
返到片野寫真館，開咗喇噃，但冇時間睇喇~~~
hur hur聲滾落山啦~~~
參道商店街開始有人氣喇~~~
店舖陸續開門營業~
可惜我地預先買咗車飛，要拜拜嚕~~~
踏上呢條橋又講下故仔~
遠至江戶時代(1603-1868)，
島民只能在退潮時才可通過堤道前往對岸的湘南海岸~
若然潮水高漲蓋過堤道的話，
咁就要靠挑夫以轎運送到對岸，路費亦以潮水的高度而定~
但自1923年關東大地震後，
整個江之島就冒咗上來，且與陸地連接咗，
從此交通方便埋，更逐漸成為湘南海岸的著名景點~
江之島行番去車站，十來分鐘就到，真係好方便~
速速回站開番locker拎行李先﹗
搭咗個幾小時車，返到新大久保了~
新大久保這個小區，都幾熱鬧，
車站得一個出口，沿路四周好多野食，乜國菜式都有﹗
仲冇新宿咁人多雜亂~
應該幾多民居、民宿、小旅館~
唔熟路，行下停下望下，
結果搵咗十幾分鐘才搵到落腳地點，
熟路的話，大概行 3、4分鐘就到~
幸好都係平路，即使拖喼也不會吃力~
呢度，原本係我地第一晚入住的地方﹗
(結果因房東失誤，搞到我地要轉去櫻台臭公寓住咗晚)
重溫-----> Day 1東京落腳遭遇
幢大廈都似係單身寡佬住的地方，
或者租畀留學生、背包客~
大門密碼入~
再用密碼開信箱拎鎖匙，
去咁多次日本，都係第一次用呢d方式Check in.....
咁樣租出去，房東完全唔駛同你見面，與你零接觸~
真係10人租2人房都冇知!! XD
呢度真係租畀遊客，起碼有執過屋，乾淨企理好多﹗
廚房廁所冇異味，但屎坑冇暖Pat裝置，好慳皮~
有個微型廚房，設備都幾齊全，
微波爐同烤箱都有~
租金仲貴過藤沢間酒店﹗@@
老公發現地下有張字條，(跌咗落地)
係夾心人 J小姐寫既，
話雪櫃入面有盒士多啤梨，請我地食當賠罪~
總好過乜都唔做既~
室內格局，一眼望晒~~~
床舖都幾舒適，不過我地冇機享用~
因為租呢度純粹為咗放行李........(奢侈吧？@@)
唔想拖住兩個大喼四圍玩，
其實仲有辦法，
旅遊精朋友教我，只要叫你住緊間酒店幫你寫宅急便紙，
將你的行李速遞去下一個下榻的酒店就可以~
以日本人處事的安全度，絕對唔駛擔心寄失~
(當然要事先通知你下一個下榻的酒店有行李接收先啦)
我地未試過，加上呢次要轉好多間，
所以唔敢玩新野，用原始方法算~ XD
是日Day 3出發，要Day 6先返來，
執齊三日換洗衣物，GO GO GO~~~
喵杯，好靚，唔知邊度買呢~
逗留唔夠半個鐘就閃~
(我地呢d chur爆行程，老人家唔好學 XD)
自己睇番都覺得不可思議......
房間在 2樓，要走又直又斜樓梯，
畀定心理準備要稱住個喼滾落去....
1樓~
一式一樣的公寓信箱~
原路返車站，今次真係幾分鐘到~
個廣告 PS得太勁了吧？
返新宿搭車，往箱根進發~~~
要坐接近兩小時車程，
但我好放心，因為列車坐位寬敞舒適~
頭頂同腳位都有足夠空間放行李~
當然行李愈少愈好﹗
為咗打發時間同醫肚，梗係要買定火車便當﹗﹗﹗
(未免買太多.....)
下圖中間果盒提子汁，飲落係啜得的提子啫喱﹗﹗
爆好飲~~~~
但之後幾天響不同便利店都搵唔番了~
見到記住要試!!!!
頭盤：古惑的燒賣~
次次去日本都想食燒賣，
不過明顯冇港式酒樓果d好食，
根本係披著干蒸牛肉外皮的豬肉燒賣﹗XDD
提供咗芥茉同豉油，
芥茉？即係牛肉嚟？媽啊我好亂啊~~~
我的主菜：飯糰、炸雞、玉子
好食﹗
幫老公揀的主菜：筍及腐皮碎飯
又幾好食﹗
食食下，發現椅背的宣傳單張，
介紹呢架車都有便當賣﹗
哎呀~~~~~
仲有甜品~
即使買咗咁多野食，
老公都想買呢個火車便當，
可惜販賣員姐姐話冇~
好啦，想試下厚切豬扒三文治，480Yen好平喎﹗
點知，又話冇......
呢盒便當係好靚，不過睇唔上了~
但仍然覺得好平好抵食﹗咁精致都只係約hk$54.5﹗
我食力無限，老公已攰到瞓咗~~XD
有野食，時間係過得快好多﹗
都未抹咀搽唇膏就抵達，Woo~~
好多人呀呀呀~~~~
箱根有吊車，又有纜車坐~
站內都有好多火車便當選擇，
我問：老公，我地回程係咪搭番呢架車？
佢答：唔係呀，返去新宿前我地都去咗河口湖啦﹗
即係冇得食......呢d火車便當lor...T.T
兩條友掛住影相，影影下見到有畀細路玩的扮車長服飾~
衫就著唔落喇，唔執輸戴頂帽玩下~ XDD
原來呢邊就係登山電車站~
我地要坐呢架去「強羅」，係鄰近山上溫泉旅館的車站~
總站去總站，都要坐 45分鐘~@@
成架車得兩卡，小巧可愛~~
(但遇著繁忙時間迫爆人就絕對唔可愛了)
我地下晝 4點幾先上山，唔係繁忙時間~
所以大把位坐~
(反而落山果邊係﹗)
想影風景，咁啱影到個車長扁咀？XD
觀察咗好幾次，唔明前後兩卡的車長點解成日換位？
可能佢都覺得煩，所以扁咀 ~=D
坐呢架電車好好玩，
佢的路線係 Z型，明明你坐緊車頭，
突然又變咗車尾噃~
到站~
山上面.....仲凍﹗﹗﹗
好多旅客都開始登陸山上旅館喇~
我地又影到車站冇晒人~
呢架電車我地只坐一次，之後去玩都唔會坐佢架喇~
車內一樣有紀念品賣~
亦有電車模型，小朋友見到實好開心~
站仔細細，佈局設計都一絲不苟~
踏出站外，見到小商店~
強羅駅外貌~
搞到成 5點，天都快黑~
出發前，參考過好多台灣blogger的分享，
佢地所住的旅館都係分佈響「公園下」(站名)附近，
有人試過拖住喼由「強羅駅」行上去行到扯蝦，
結論係：斜坡激斜﹗
於是佢地建議同提醒大家，
可以響「強羅駅」搭一程登山纜車(係纜車，唔係求先果架電車!)
坐一個站，於「公園下」落車，打橫行平路去旅館，
就會舒服好多~~~
變態的老公係都要考驗大家的體能，
仲話都冇拖喼，梗係行上去啦﹗(下.......)
好啦~ 仲有氣有力陪你癲﹗
纜車拜拜~~~睇下邊個走得快~XD
由於天快入黑，我地就沿住纜車條路向上爬，
實唔會走錯~
斜度都唔野小，可以當行山~
不忘欣賞下周邊的特色旅館~
回頭看，架纜車仲未開~
的確，等得佢嚟都行鬼咗上去﹗
行咗 5分鐘，已經望到第一個站~
我地都好龜速下，因為真係斜~
結果架纜車真係而家先到站。XD
車站附近有Cafe同箱根寫真美術館~
呢種天色，好有氣氛~
直接行入個站，走到前面個強羅公園出口~
哇~望返落去，真係好斜﹗
拖住喼唔好學我地行上去呀實後悔﹗XP
出口轉左行幾分鐘，就可以找到旅館~
呢條路都有食肆同便利店，
強羅公園入口亦在此，
我地的旅館行出去，就係強羅公園﹗
酒店過條馬路就有便利店，不過只營業至 10:30 pm~
有停車場，自駕遊啱晒~
見到旅館招牌了~~
每次搵到旅館果刻，都好有成功感同滿足感.......
其實由強羅行上來，都一直下著毛毛雨，
又濕又凍，但二人寧願拎相機都唔想拎傘~XD
望下條斜路，驚唔驚先？
好彩唔駛拖喼，老公英明~~~
我諗可以連人帶喼碌落強羅都似.......
到門口，一陣暖氣吹過來，解凍啊~~~~
住呢間：Merveille~
一入大堂就見到紀念品部~
仲有浴衣閣 (個名老作)
接待處細細，光頭經理識英文~
接待處對正大堂，好多大梳化，好多著住浴衣的旅客，
原來佢地等緊第一輪晚飯~
首輪：6:15pm
次輪：7:45pm
我地趕唔切首輪，所以等次輪~
仲好，多d時間回一回氣~
(上網book房時已訂埋兩晚的晚飯，最好訂埋啦，
附近要食野都應該幾麻煩~)
Check in時會簡單介紹旅館設施，
提醒早餐晚餐的用餐時間同位置，
仲會有張正確使用溫泉的各國語言單張，
未試過浸溫泉的，可以有個清楚概念唔好失禮~
電梯大堂有男女浴衣選擇，
咩款式咩尺寸都有﹗任揀﹗
而大堂更有開放式紀念品售賣處，
粉紅色果堆飯焦(好似以前有賣的暴暴飯焦)好好食﹗
必買~~~
難得來到都揀比較好的房間，
呢次住最高的 5樓﹗
走廊的牆身同木門都裝潢得好華麗啊~~~
開門見到，哇﹗﹗好大的一間房~~~
(係呢個Trip最大的房 XD)
好奢侈啊，得兩個人~~
(冇對比過其他房，可能係細房呢又？)XP
我地揀的浴衣~~
洗手間的佈置都好華麗啊~~~~
但呢兩晚都落咗去樓下沖涼浸溫泉，
根本冇機享用到房內的浴室同d蜜糖系沐浴用品~~@@
旅館貼心地提供咗一籃子.....溫泉用品~
一人一個唔駛爭﹗
內有大小毛巾、兩趾白襪仔、浴衣腰帶，
仲有透明膠袋畀你放小物或濕咗既野~
枱頭仲有幾個按摩用品畀你用，
用完覺得好用，可以落大堂買返屋企﹗
鎖匙牌全木製，又係同大堂紀念品專區的木製品互相呼應~
凍冰冰，即刻沖番杯抹茶暖下身~
剛才提過大堂果堆粉紅色飯焦，
點解知好食？因為入住時請埋你食，
啱食就落去買啦﹗(<---中晒我心意)
每日執完房都擺低兩塊，果然小財唔出、大財唔入﹗
我十分欣賞~
攰到攤C期間，電視播叮噹~~~~
仲有兩日就情人節，連叮噹都播情人節故事呀~~<3
臨食飯前半小時，
我拉老公落咗便利店入貨~:D
呢個公主窩夫蛋糕............十個好食!!!!!!!!!
窩夫皮又香又軟又煙韌，蛋糕又鬆又軟綿，
實在太大驚喜喇~~~~~
(又係之後再買唔番~@@)
檸檬Cake，造型成個檸檬咁，只係港幣幾蚊貨仔，
好好食!!!!!
可惜好難拎，實夾扁，如果唔係買一打返來派!
即食半熟蛋，周圍都有，一定好食~
牛奶好飲，有氣車厘子梳打也不錯~
7:30pm，起行落樓等食飯~~
大堂亦提供各旅遊景點的小冊子，免費畀你拿取~
好多人都換咗浴衣來食飯，我地好攰，聽晚先玩~XD
旅館指引，係容許住客穿著浴衣響旅館內周圍走都冇問題既~
一個旅館，只有一間餐廳，叫「花暦」~
可能服務夠集中，
餐飯令我印象最深刻的，是大廚會為每一枱客人客製一獨有的菜單，
用極高級的和紙、極雅致的字體，成份print咗出來﹗﹗
最後仲有埋大廚的名字~
我對呢份尊重同心意無比讚賞~~
最後兩晚的餐牌都畀我地帶咗返去保存~
當然，呢度的晚餐都相當不俗~
好多海鮮，大愛~~~
個鍋一d調味都冇落，只用材料滾出鮮甜無比的湯底~~
咪睇碟碟得幾啖，成餐飯好似食法國菜咁.......食咗好耐~@@
我地額外叫咗飲品，我選了巨峰酒~
老公選了凍清酒~
雖然睇唔明個餐牌自己食緊乜，
不過我就係中意睇唔明~~~
千祈唔好畀d中文翻譯我添啊~XD
燉肉，飽到畀埋老公食~~~
最後仲有飯、漬菜、湯~
還有期待已久的甜品~~好清新~
馬拉松式食到九點幾.....食到餐廳都冇晒人~
飽到上喉嚨，大滿足~
點解其他人可以食得咁快呢？？
臨上房時，忍唔住拎咗件細路浴衣~XD
童裝大碼，應該著得落......XDDD
睇下，點解呢件咁得意咁可愛架？!!!!!! 喵~~
玩下姐，旅館應該唔介意~XDD
你睇，幾啱身，完全靚過大人款啊~~~
當然，我係冇著住佢落去浸溫泉啦~
由於吃太撐，要抖番一輪先可以浸溫泉，
而溫泉又成 1:00am先閂，
所以我地由 9點幾hea到凌晨 12點!!!!!
先慢條斯理落去嘆~
男、女湯分開，兩公婆自行enjoy~
(網上圖片：淋浴間，無遮無擋的後面就係溫泉區)
(網上圖片：女湯溫泉區就只有一個大池和一個圖按摩池)
聽聞男湯果邊有戶外風呂，比女湯大一點~
浸後感：
-沖涼位置不多，大概 8格，浸緊溫泉的人可以睇晒你沖涼的過程
-大池的水十分熱，熱到可以淥熟腳
-按摩池十分舒適，水溫剛好，浸耐d都唔會暈
-同場溫有得桑拿房及冷水池
-場內提供兒童椅設備，放便母親安放處置
優點：
-化妝間算大，仲有按摩椅、按腳椅任玩~
-化妝間提供了貴價護膚品任用 (就是大堂有賣的產品)，非常豪爽~
-溫泉開放時間夠長~
缺點：
-場地太小
-繁忙時間實爆棚
-沖涼同溫泉位置相隔太近，私隱度極低
攻略：
-學我地咁，臨閂門先去，有幾夜得幾夜，就可以包場﹗
我連續兩晚都成凌晨 12點先去，完全冇晒人，
如果你唔係細膽、
唔驚暈咗冇人知、
唔會諗溫泉裏面有冇貞子....
我絕對建議：一係晨咁早去、一係鬼咁夜去﹗XD
至於畀人睇全相呢家野，其實冇乜心理障礙，
反正你有既佢都有，大家又唔識，
有咩好怕醜先？
日本溫泉，值得體驗，公眾果隻﹗
諗諗下，原來我第一次浸溫泉唔係2015，係2014大阪之旅!!!!
初體驗就係堺市的去公眾溫泉，
當時住響台灣人經營的民宿：桃子媽媽的家~
佢地仲畀咗張溫泉折扣券我地去玩添﹗XD
重溫：2014大阪遊溫泉初體驗
沒有留言:
張貼留言