13/2/2016 (星期六) 年初六
旅程第四天：箱根
今天天氣特別晴，不過..........好戲在後頭~@@
瞓到八點幾起身，張床舒服到差d唔想起身咁滯......XD
拉開窗簾，又是非常好的天氣，感恩﹗
下樓吃早餐去~
旅館的晚餐分咗兩場，早餐就冇，
7至10am內，隨時可以進來吃~
很喜歡日式早飯，豐盛又繽紛~~~
中意佢每樣少少，好似食咗好多野咁﹗(的確係好多野)
日本薯仔沙律硬係好味d，一Pat Pat又軟滑~(一定落咗好多牛油@@)
下面呢小碗是山芋，黏黏稠稠的，
呢幾日的晚飯早飯都有吃到，
有d人好抗拒好似食鼻涕咁，
但其實佢含有大量膳食纖維、胡蘿蔔素、
維生素ABCE及鉀鐵鈣......等等等等微量元素，
營養價值超高，可以促進腸道蠕動，通便﹗
響香港想食就要搵搵，大戶屋有，自己整就咪搞喇......
吃到不同特產美食，都係旅遊的樂趣~
(對我而言，直情係旅遊目標.....XD)
山芋外，呢幾日不論去鎌倉、江之島，以至箱根，
都成日見到白飯魚(日本稱吻仔魚)，
老公乜魚都唔食，就係中意白飯魚.....@@!!!
一客定食裏，包羅各樣煮法的料理，
響日本做主婦唔易，乜都要識煮喎.... (廚師都話係受薪吖)
加埋一個人一餐飯用九萬隻碟仔......洗都洗到傻~
(離題，但我次次都會咁諗~XD)
早餐的甜品是清爽的杏仁豆腐，我至愛﹗
返番嚟，有燒魚，本身條魚係熟咗架喇，
畀個爐仔你燒熱佢過下癮啦~
燒魚我最愛吃，老公不愛，我食曬兩條﹗﹗正呀~~~
燒完皮脆好香口，肉卻唔嚡噃~ 送飯一流﹗
咦唔記得仲有隻溫泉蛋送飯﹗
但我又好想食納豆、蘿蔔同酸梅喎......!!!
仲有麵包超人飯素~
結果呢一朝我已經去得好盡，一於添佢兩碗飯﹗XDD
儲夠能量，出發是日行程~~~
爆曬!!
旅館門外的斜路真係斜，拖喼來要有心理準備~
旅館行出來左手邊是強羅公園；右邊就是便利店，
直行是登山電車「公園下駅」~
今次我地要登山、坐吊車、再坐船﹗
登山電車全程得六個站：
(由山腳上來)
強羅 > 公園下 > 公園上 > 中強羅 > 上強羅 > 早雲山
我地要坐到總站，由第二個站坐，都只係坐咗10分鐘左右便到達~
*******
如果打算響箱根玩三日，可以預先購買：
「富士箱根周遊券 Fuji Hakone Pass」7,400Yen (約hkd$505)
*可在三日內自由任搭箱根與富士地區的特定交通工具，
包括箱根登山電車、海賊船
*享有該區約60間美術館及餐廳的折扣優惠
購買點：新宿小田急線
新宿西口Odakyu Sightseeing Service Centre
(淨係外國旅客先買得)
去到早雲山站，要轉一程車先到吊車站 (即空中纜車)~
原本老公想去大涌谷，
但出發前得悉大涌谷因為火山爆發，所以纜車暫停行駛，
不過冇影響旅客遊玩安排，因為安排咗接駁巴士，
巴士會停早雲山站、姥子站、桃源台站 (不停大涌谷站)
買咗套票，優先排短果條隊上車~~~
箱根d所謂巴士，好細好細........好迫好迫~
山上還可見到雪~
因為我地想坐下空中纜車先去坐賊船，
所以只係坐到姥子站就落，基本上好多遊客都係咁~
站外有假狗纜車畀你影相~XD
再假d，都有﹗
將近11:00am抵達空中纜車站，見到成堆人貼住個窗既？﹗
原來﹗大家影緊富士山~~~~﹗
我急急腳撲去窗邊影低呢一刻，因為竟然幸運睇到﹗
好可能下一刻就冇咗架喇~~~
老公不明所以，以為去到就一定見到，
唔係呀嘛﹗你竟然唔知一年365日中，只有100日左右先見到富士山全貌？﹗﹗
無知的男人~XD
(我點解知？可能係我博學呱........？)爆~XD
所以有機會來到，又見到，真係幸運到不行~
唔好再以為幾時去都老奉睇到呀，
我地影完呢幾張相，坐上纜車後，個山即刻就畀雲層掩蓋，
全日都冇再見過佢~~~
車廂有冇大過360呢？
坐滿人先開車，
幾乎冇得揀位坐架喇，
但如果霸到，最好坐近開門位置~
因為呢邊面向富士山~XDD
影相唔會畀車內人頭遮住囉....
回望上山，好似剛剛上完山，又要落山~@@
十分鐘內，已經落到桃源台~
金光閃閃的蘆之湖~~~
唔好睇少呢個湖，佢係箱根山的火山湖，
是神奈川縣內面積最大的湖泊，擁 3,000年歷史~
可遠眺富士山外(好彩的話)，
最好搭下遊湖果隻賊船啦~(海賊船啊)
唔係去嚟做乜？XD
纜車站落一層，就見到海賊船入口指示牌~
未夠鐘，可以去旁邊紀念品店放下血~
Whowa!!!!!!!!!!!!!!!!!!!!!!!!!
叮噹，好大隻叮噹!!! 點拎啊？Orz...
一直好想吃吃大涌谷黑蛋，
聞說是用大涌谷溫泉水煮出來的，
由於煮蛋時鐵質會黏附在雞蛋上，而鐵質又與硫化氫產生化學反應變成硫化鐵，
所以蛋殼就會變黑~
食一隻，可以長命七年喎.....
呢次去唔到大涌谷，食唔到黑蛋，
但響桃源台見到黑色蛋，照殺!!!
燻蛋嚟，且內附溫泉鹽畀你調味，
我估都係咁上下野啦~~
係好食既﹗﹗
箱根之森水，無疑是生命之源啦~
但係呢支叮噹吸引我多 d﹗XD
要留意，海賊船的行駛時間幾乎成粒鐘先一班，
錯過咗，等到喊~
我地呢日搭11:30am
落到下層，超多人排隊，
其實唔駛傻豬響度等，因為上到船都係坐散晒，
除非你真係好需要坐，
否則上船中意周圍走的，夠鐘先落嚟上船啦，
有票就實上到架喇~~~
*有周遊券的唔駛再買票~~
夠鐘，上船，哇好曬呀~~~~
好靚好夢幻的設計~~~
上船即有小賣部~~~
樓上樓下都分咗幾層~
我地中意探索，梗係唔會坐定﹗
唔係隻船冇人，係d人走晒去坐，或者上晒甲板了~
船艙內，有 3D立體畫畀你玩，OK似噃~
特別船室，特別靚，
想坐的話 (或扶老攜幼有需要坐得舒適)
可以上船後畀多少少錢，去特別船室坐，
做咗貴賓，仲可以上去甲板的船頭靚位看風景~~
成人 500Yen (約hkd$34)，小童 250Yen (約hkd$17)
值唔值見仁見智~
玩完船艙，上甲板去~~~
天氣好到不行~~~~
不過超級勁大風~~~
想影張見到面的相十分難~~XDD
老公都冇眼睇﹗XDD
欣賞 下蘆之湖美景，遠望山景吧~
下圖呢d船頭位，就係貴賓室的人先可以入去~
我地咪留番船尾玩囉~XP
離遠見到另一隻賊船~~~ 黃色既~
好明顯紅色呢隻靚 d~
太大風，吹到頭都痛，係時候折返船艙~
船長你好~
11:30am上船，11:55am就到達箱根町港~
箱根町港碼頭外貌~
上岸後的行程非常豐富，
我地預計去杉木林、水中鳥居等~
不過計劃是趕不上變化的.......
個銅像完全展現到跑到筋疲力竭的感覺﹗XD
好多地方都見到呢隻花，唔知咩花，但好靚~~~~
其實似食得的椰菜花.....
周邊好多雅致的餐廳~
溶雪中~
沿途有好多巴士接駁去不同景點，唔難坐，但我地冇坐~
精彩的地圖，一目了然~
富士山地磚﹗好靚﹗
黑喵宅急便~~~
趕住送貨呀佢﹗XD
好舒服的小區，有旅館~
行行下，去咗箱根關所~
點知個牌隔離果個係真廁所，
結果我就睇錯咗，以為呢個景點叫箱根廁所.......XDD
原來呢個係江戶時代德川幕府防止諸侯反叛而設立的關卡，
建於1619年，絕對係世紀遺跡，
係用來查禁妄圖違法闖關的可疑人，
尤其對攜帶槍彈進入江戶和要求出關的女性嚴加盤查，
如果強行闖關或企圖破壞關所的話，
果個人就會被處死刑......@@
為咗穩定政權的統治，而設立埋呢d關卡.....
我就冇畀錢入去睇喇~
但真係去咗廁所既~
唔駛畀錢果Part，可以入去行下，
建築物都十分懷舊~
有上半棚牙，有隻反轉的貓，
猜什麼？
霸氣的武士？
包頭的賊仔？入型入格......XD
好Vintage的小賣店﹗
門口竟然有船梨精貓咪小帽﹗即扭﹗﹗﹗
哇~~~~可愛爆燈 <3<3<3
即刻迫老公用佢d散紙再扭畀個女﹗XD
一貓一頂，卡娃依~~~~~
我仲買咗人手製貓咪木杯墊，
會於終極手信篇分享~
幾間舖仔，都玩咗我地半個鐘~@@
離開箱根關所後出大路轉左上斜，
一直行約10分鐘，
就會見到恩賜箱根公園入口~
對於日本的公園，我地係有d情有獨鍾~
由於周圍溶緊雪，所以d石頭都幾跣腳~
有指示提醒你小心PK~
上公園的入口~
這裏有很大的停車場，自駕遊啱晒﹗
要上斜，不停上斜，點解要咁傻？﹗XD
公園好大，人影好少~
同埋我見到好多日本人都係著西裝、洋裝、皮鞋、高跟鞋行上去的，
但行得快過我地著波鞋﹗﹗
(咁同著皮鞋老西去海馬公園畀人笑的強國人有咩分別？)
係囉，咪係民族的分別囉~XD
行到扯晒氣，上到來，值﹗﹗
非常漂亮的蘆之湖美景~~~
這裏有湖畔展望館，上二樓可以看到更開闊的景觀，
但我們沒有上~
兩夫婦就係覺得自己擁有無限體力.......
上完山又落山 >w<
今次真係去原定的杉木林~
離開公園後繼續往左邊上斜，
約兩、三分鐘就會到杉木林 (箱根舊街道杉並木)
馬路旁的欄杆，也是用木搭砌而成~
整齊而考功夫﹗
到了到了~~~
這是從箱根町港前往見到的入口~
林蔭道內的杉木，已有近400年歷史，
最粗的樹圍可達 4公尺~
相傳呢度近 420棵參天古杉樹，都是栽種於1618年，
夏天可為行人遮擋日曬，冬天則可抵擋刺骨寒風﹗
林蔭道全長約 500米，在當中漫步的確舒服怡人~
邊走邊聊邊影相，都係行咗大概 20分鐘，
將近行完的時候，我地見到個天開始風雲色變.............
此時，貪婪的遊人 (我老公)，
還好執著想去埋水中鳥居~@@
我淨係好想搵車搭，走人，寧願早d去美術館博物館乜都好，
最緊要有瓦遮頭繼續玩﹗(是明智的考慮)
望出個湖，愈來愈大雨喇~~~~
老公想去的鳥居響邊？佢話呢度都望得到喎﹗
(下圖，正中央，紅色果一丁點﹗﹗)
咁樣叫近嗎？
最終我地係等唔到車，狗屎又繼續加碼，
唯有行去箱根港 (海賊船另一個碼頭) 附近再搵車離開~~
*海賊船連接三個港口，
包括我地上船的「桃源台港」、
我地落船的「箱根町港」、
同我地徒步都可以過到嚟的「箱根港」~
途經箱根蘆之湖美術館，冇入~
呢度都有巨型鳥居啦，影呢個算啦﹗XD
黃色賊船~
睇下個海............睇下個天...............
風雨欲來呀!!!!!
鳥居呀嗱，快d影飽佢畀我走~~~~XD
我問老公點解咁想影果個，佢話：因為係水中鳥居，響水入面......
碼頭對出有好多巴士坐~
人多、落雨、車少兼且細，嚟到都裝唔到大棚人，
兩條友全身濕答答又上唔到車，
諗住等下一班船返桃源台港再轉車返強羅，
但要等一小時 @@
好彩，等等下見到終於有巴士，即刻飛奔上﹗
踏過超過半小時車，迫到嘔，落車，再轉車﹗
今次我地要返去旅館附近的景點玩~~~
呢架車頭頂有天窗，睇下幾大雨~~~嗚~~~
旅行至怕遇著落雨，不過箱根d天氣似乎係咁變幻莫測~~
住咗兩日，都係朝早曬到嘔，愈晏愈陰雲密佈~
坐咗個半鐘頭車 @@
終於返到我地住果頭，
落車的車站叫「濕生花園」XD
燈凳~~~ 為咗來《小王子博物館》，
辛苦d都冇計~
所以我想早d嚟囉﹗
其實一直冇乜點好小王子，
對佢亦唔係好認識~
但來這裏玩一圈，作為大人，我地都對小王子呢個故事更感興趣~
雖然落住雨，但無損玩樂心情~~
因為呢度，好﹗靚﹗﹗
呢種天氣，令個花園更添淒美~
好古堡feel，好有法國味道~
連舊唔起眼的地磚都係星星~~~
入場時，有提供透明雨傘讓遊客使用~~
真係好好好好靚，好有味道，影相一流~~
完全是法國小鎮啊~~
噢~~~小王子~~~
入到園內，有博物館，上樓就有關於小王子(作者)的生平展覽~
唔知小朋友睇小王子，明唔明佢講乜？
但我覺得，小王子係畀大人睇既的深奧「童話」~~
《小王子》Le Petit Prince
作者：Antoine de Saint-Exupéry
故事：
講述一位住在 B-612行星上的金髮男孩，
離開了一朵驕傲但很心愛的玫瑰，
到不同星球展開一趟星際旅程，為自己追尋理想。
期間，
小王子在不同星球遇見不同的怪人，
例如國王、自負且虛榮的人、酒鬼、企業家、點燈的人、地理學家等等，
最後小王子來到地球，與狐狸和飛行員相遇.....
故事包含了反戰爭、反衝突、反自私、反以貌取人等元素，
作者更藉著小王子純真的心，
告訴我們：
「真正重要的東西，用眼睛是看不見的。
只有用心，才能看得清楚。」
的確，我們無法不長大，但每個大人最初都曾經是小孩子，
我們可以決定自己看世界的方式。
用心行展館一趟，慢慢細味作者的生平事跡，
了解《小王子》如何誕生，他與作者的自身經歷有何關係，
你定會對這部童話更感興趣~
(有人回港後就急不及待去買咗本小王子)@@
* 1943年推出，至今已被全球翻譯成257種語言版本，是世界最暢銷書籍之一。
小王子造訪第一個星球時遇到的國王。
代表唯我獨尊的人~
第四顆行星，屬於一位企業家。
他目中無人，滿腦子都是數字，
以為不斷演算加法便可致富，發達後可以買埋其他星球~
住在第五顆星球上的點燈人。
他替別人點燈，不自私自利，不過是個墨守成規，盲目服從的人。
住在第六顆行星上的地理學家。
是個紙上談兵的假探險家，僅對一成不變的山河有興趣，
是食古不化的人。
博物館內還有猜迷遊戲玩，
可惜只有日語版本，我們無法參與呢~
教堂內呢個小盒子有蓋印，
d日本遊客就周圍搵蓋印，蓋在小本子上連埋個圖案，
就會搵到答案。
(目測估計，係咁上下玩法呱~XD)
冇得玩，參觀下都開心既~~~
教堂牆身都有好多星星~~~~
或者呢日天陰陰、毛毛雨，又冷冰冰，
來探小王子特別有feel~~
展館地下有影像介紹，日文唔識聽~
其實作者本身係個飛機師嚟~~
小王子深愛著的玫瑰~
我地兩公婆，響入口拎咗本繁體字介紹書，
逐項展品跟住睇，睇咗好耐好耐......
我諗冇作者咁複雜精彩的自身經歷，
應該好難寫出一部意味深長的童話，
他本身是個飛行員 (幾歲時坐過飛機自此愛上，誓要考到做飛機師)，
周圍飛的期間，又會自己畫下公仔寫下野來抒發情感，
(所以直接兼任作家)
小王子外，佢仲有好多好多作品~
而小王子的出現，係緣自一次響餐廳內見到有小朋友扭計仔，
佢就即場拎張餐巾畫咗個坐響星球上的小王子來氹佢﹗
一直住響作者心底的小王子，雛型就係咁誕生咗~
(希望冇記錯，因為場內唔畀影相，留唔到睇過的資料)XD
不過天妒英才，作者安東尼響 44歲時，
在一次飛行任務期間失咗蹤......
估計飛機失事意外身亡 @@
行完，有淡淡的哀愁~~
行完，仲有點點肚餓~~~
肚子簡直在悲鳴﹗
餐廳收 6pm，仲有一個鐘，趕得切食埋個下午茶﹗Yeah~~
不能接觸咖啡因的我，去親日本都會破例品嚐咖啡，
是覺得好喝，喝了還覺得很舒服~~
陣間返旅館還要吃晚飯，
但我們沒吃午餐噃~~~!!!
食番兩個甜品先~~
發現甜品上有精致的玫瑰啊~~~
甜品好味道﹗
也點了一客洋蔥湯焗麵包 (之類物體)
但甜品後才來。
還是覺得甜品較好吃~哈~
小休一回，要離開了~~
好浪漫的感覺~~~~
花園亮了燈更華麗~
臨走前要去放血~~~~
掛住睇同買，冇影店舖環境，呵~
購物袋咁靚﹗最欣賞呢個防水膠袋.......幫到大忙了~
真的真的要說再見喇~~~
入口旁有Locker使用，走時先知~
有人好唔捨得走~~
好滿足~~~
推介小王子博物館，要來看看啊~
行到閉館......其實都未到 6pm......
但是!!!!!!
我們錯過了尾....班.....車!!!!!!!
嗚哇~~~~~~
好玩喇今次，
遊日第二次錯過咗尾班車，痴鬼線~
點解作為景點線會咁早冇車架........@@
唯有搵架可以搭到最近旅館附近的巴士搭..........
(截的士，佢飛車唔接 !!)XD
都係靠Google Map.......
老公話落車後行15分鐘~ (已有心理準備不相信)
搭咗近半小時巴士，唔記得邊度落咗車，
睇住Google Map，
一手撐傘、一手開電筒，
一前一後行咗入條勁黑勁斜的小路!!!! (闊度只容得下一個肥人)
*Google點咗條快但好鬼危險的折徑畀我地......
作為女人仔，梗係邊行邊喪鬧爆老公點解會咁架？﹗
期間，行到去樓梯接樓梯的小平地上，
突然望到對腳!!!!!! (因為全程石級勁跣驚住PK滾落山所以一直望住腳下行)
我帶頭拎住電筒，照到一對著住西褲的腳同個公事包，
我下意識講咗句：書咪媽聲 (噗咔) <---老公在後都跟住講咗次
佢就讓咗畀我行先，但冇應我地......
(日本人多數會回番句架嘛，又會唔出聲既？)
當然我唔敢照上上身啦，點知見到咩樣架.....(想太多)
anyway.....去到馬路回一回氣時，
我的確有諗呢條路斜到咁，
仲要冇街燈，仲要落緊雨，
上山都跣腳，點樣落山呀？
(*仲要對方係冇拎電筒物體架.......)
有冇咁堅可以行到呀佢？﹗
上面呢張相，已經係行咗幾段之後見到街燈先影番張用嚟紀錄﹗
行咗成半個鐘先去番強羅，仲要條條奪命斜，
沿途除咗爆粗外，冇野可以發洩肉體上的疲累!!! XD
(不過的士都唔載........冇計)
我唔理，行到上旅館對出間便利店，
即刻買咗兩條雪條隊隊佢，
下火呀~~~!! XP
抹茶花生脆皮朱古力軟心雪條，十粒星!!!!!!
朱古力格格威化雪糕，一般，同Monaka差唔幾，
三粒星~ (但我係中意食Monaka既)
準時 7:45pm，落去開餐~~~
終於可以抖番下.....呼~~
仲諗緊會唔會兩晚晚餐一樣，冇喎，唔一樣喎﹗加分~~
今晚有小火鍋吃~~
菜式以不同的花做主題~~
十分愛吃櫻餅~~
最愛的魚生~~
老公唔食，畀埋我，賺晒!!!! 哇哈哈~~
唯有牛肉火鍋畀佢食多d~~
墊枱紙都咁靚~~
好多野食，餐餐都飽到上喉嚨椗~~~
本來想吃吃和牛，好抵，但不知來自何方，
好彩冇叫，應該食唔落~
吃飽飽，出去大堂坐下攤抖下~~
我一直睇中佢既護膚品~
浸完溫泉有得響更衣室試用，好用，可以買番盒~
必買飯焦~
買咗，唔貴~~
電梯大堂有兒童書閣~
有人拎咗本乜野來睇呢？
JR全特急圖冊~~XDDD
住埋今晚就要走了~~~~
大堂免費任飲的飲料機~~
有茶、有咖啡、有朱古力~~
飲番兩杯，坐下買下，先捨得返上樓~~~
繼續消化到凌晨12點先落去浸溫泉，
爽YY ga ne~~
沒有留言:
張貼留言