2016 開心靚太新春東京九日八夜遊 Day 1

10/2/2016 (星期三) 年初三

去年大年初三，我倆正出發去名古屋之旅，

一年後，去東京~~!

適逢赤口不宜拜年，

估唔到呢日都有人畀我開佢年~(記得睇到落底)XD

呢次選乘香草航空，冇野食，冇電視睇，

仲要搭下午機，去到成田機場再轉車出埋新大久保，

估計要晚上10點幾先到~@@

臨出門口，隻細女畀咗呢個表情我....

「你地今次又獨留兒童在家幾多日呀.....」

(放心，叫咗公公嚟湊你地，媽媽保證買好吃的給你們) XP 

　搭香草要去Terminal 2 Check-in~

 排隊方式極其混亂兼效率低......

 辦完手續又要行番去Terminal 1，

(上落機仲要行樓梯冇天橋接駁)

所以廉航都係留畀後生仔，有老人家同行唔建議揀~

新春期間機場都多d花臣搞，

好熱鬧，好多喼，好多強國人.....

 個個排隊逗財神封利是，

如果冇人排，我都想拎番封既~XD

 反而隔離的民間小攤檔幾吸引，

 點解麵粉公仔大排長龍，但龍鬚糖檔拍烏蠅既？

冇人排=狗衝去拎番兩粒，即製，好好食!!!!!

 搭1540，預當地2045落機~ 

其實廉航除咗d位迫d外，基本上落機都冇乜Delay，

甚至有機會早到，

雖然冇飛機餐食，又冇電影睇，

但起碼佢達到乘客基本要求(--->盡量準時)吖~

 但去東京坐四個幾鐘，

對我呢d過度活躍症來說，唔郁得又冇野食冇野做，

真係好惡頂............XD

 冇帶書、冇歌聽，

唯一帶咗零食，靚太必備~

 珍珍真係好好食，童年回憶，香港人的味道~

至於童星，還是原味最好吃~

經歷悶到吽菇的機程，終於有得伸展~~~

咦，個機場變咗跑道，好頂癮!!

呢個設計我中意! XP

Hi~ 又係我地，

希望我同你日後能夠Keep住儲多d旅遊回憶~

 等咗一陣就拎到行李，相當不錯~

拖喼，一齊跑呀~~~

 沿途經過回程時會Check-in的櫃位~

 繼續跑道~

 原來落咗機係要行好Q遠去搭車架.......

 拖咗成千米都有.....@@

 望實「鐵道」的指示~

 地面落一層就到~

 呼~~

 買飛出新大久保，中途於日暮里轉車~

 就響左手邊呢度買，當然自己襟機都得~

**********

正當我地拖住兩個大喼搭緊車時，

就響Wechat同當地旅館負責人聯絡，

話聲佢知我地正在途中好快到，

點知，呢位女負責人(M小姐)將個波拋咗畀另一個女人(J小姐)，

叫我響Wechat add對方。

然後，J小姐就錄咗段說話，

同我講：

「因為搞錯你們的入住日期，以為是明晚，
而昨晚的客人還要多住一晚，

所以現在會安排你們去櫻台一個地方住宿，

不好意思你們不要去新大久保了，直接去櫻台下車，
走過去大約幾分鐘就到，有兩個大房間給你們住.......」

(咩話？!!! 呢個moment，初三赤口之戰正式公演!!!!)

試想想，往後多天的行程我們也是按入住的「新大久保」作出發點，

突然話轉去「櫻台」，作為遊客實在拿手唔成世，

加上出發前一日同落機後都事先畀咗通知，

所以錯不在我方。

我第一句劈埋去：「可以這樣的嗎？﹗」

(下刪九萬字請自行想像)

不過當我將呢個消息講咗畀老公知之後，

估唔到佢個火燒得比我更強 XD

前思後想，對方也沒法子踢個住客出街畀間房我，

除咗答應轉住櫻台，實在別無他法。

然而在我用文字鬧爆佢地後，

夾心人J小姐開出如下條件安撫我們：

1) 翌日幫我地搬行李去番新大久保的住處

2) 免收我們一晚房租

其實咩條件都係其次，

令我最不滿的是老闆M小姐將個波拋咗畀人，

唔夠膽自己同我交代件事，

但Sorr9y我係會照樣咬住唔放，

問到佢落實邊日退番一晚房租畀我為止!!!!

註：後來得知M和J都是嫁了去日本的強國人。完。

響hotels.com預約旅館前記得check清楚口碑~

(btw，呢間我地係for擺行李而已.....)

 臨時轉線去櫻台，靠老公用app解決~

 阿房東純粹cap咗呢個路線圖話我知個私人公寓點去，

大佬呀，個住處點都有個名下哇？

 終於識得畀個名我，

咪照copy落google map搵~

 搵到呢間，個名一模一樣，

叫我入去開信箱，門匙就放在內，

喂，開唔到喎~

 搞咗一輪send埋相佢睇，

頂，原來唔係呢幢，佢係畀漏咗前面「第2」兩個字我.....

(即係同名第2幢)

幾度吹住寒風成11點幾下，最終搵到個入口喇~

強國人，去到邊度做生意都係不實商人沒錯~

九秒九放低行李痾篤尿，立刻出發去醫肚!!!

 櫻台，呢個係民宅小區，

沒有五光十色的招牌，店子都是老老舊舊的，

其實幾喜歡，

但若不是這次差錯，我們是絕無打算踏足此地區吧~

 唯有當錯有當著，當旅程去多一個「景點」@@

 由車站行去公寓，熟路的話大概只須幾分鐘~

 

 好多舊式居酒屋，

但呢晚唔想再傷神同人雞同鴨講了~

 決定去我一直想試的松屋，

來過日本無數次也沒機會吃這間!!

 是吉野家之類級數吧？

好平，幾多野食，仲好啱食~

 我淨係知畫東京肉肉的John Ho，

響東京留學時就當呢間係飯堂~

 

 果然，好多獨行男子夜媽媽來晚飯，

看樣子應該是加班太晚吧，真疲累~

其實都有好多女仔來買外賣的~

 在販賣機點了好幾樣~

老公的泡菜牛肉飯，還有香腸、薯仔沙律、麵豉湯~

 我的玉子豬肉飯，豆腐湯十分足料超級好喝!!!!!!

 

 如果香腸有得逐條叫，我想食十條........點解咁好食？!!

 也是疲累到不堪的二人.....@@

 自己買票，附中文，方便~

 有丼、有咖哩、有定食.......好多選擇~

食cheap野都可以好滿足!!!

食飽回程，勁眼瞓，沿途散下步~

 凌晨12點都仲有人跑步踩單車，條街算係有d人~

**********

呢篇Blog的戲肉來了，

既然「有幸」入住真正的(偽)日本人之家，

唔係唔大公開大揭秘呀嘛？

睇你有幾乾淨整潔!

 第2，呢度先係第2幢!!

 住5樓，冇電梯~

 換句話說，

我地剛才係拖住兩個大喼行足五層樓梯上樓既!!

 又窄又直的樓梯~

 

 一梯兩伙，上到頂樓~

 估計堅係房東自己間屋~

唔知有冇再租出去畀人啦~

 一開門，有陣怪味，

就係一般家居獨有的屋味~ 或可叫唔打掃味~

 

本來由一間房，變咗成間屋畀晒我地，

斷估至少700呎，兩房一廳一浴一廁一露台~

 廁所冇洗有陣味~

 浴室撻地仲係濕既，

唔通求先冚家人冇鞋挽屐走？XD 

 兩間房一係碌架床，一係單人床，

結果我地決定一齊瞓碌架床下格~

 冇暖氣(有機但估計對方刻意收埋搖控掣)，凍到無倫，

電視又開唔到~

 廚房、餐枱一眼望晒~

呢邊有暖氣機，即開~

 另一間房，冇乜擺設得張床~

仲有一排全鏡衣櫃，

其實我覺得好恐怖，一定唔揀呢間瞓~

 入屋後梗係乜門都開嚟睇下，

唔好話我八卦，係警惕，

你點知d間屋入面藏咗d乜呀？XD

 典型日式廚房~

 廚櫃~

 雪櫃，好雜亂，亂過我老公間房~

 仲發現有碗冇封保鮮紙的湯 @@

 碗野有飯、金菇、獅子狗卷、粟米，

成碗鯨晒，究竟乜菜式？(好嘔心)

 有雪糕都唔敢打開，可能係第二d野 XD

 又亂又有異味~

 我地就坐響呢度嘆住暖氣傾翌日行程，

然後一齊瞓碌架床，成晚都唔夠暖，

又廢事去鏡房張床拎被，唯有互攬~

 

呢晚唔係瞓咗好耐，兩個幾鐘左右就要起身，

出發去另一個地方!!!!!!

旅程中的突如其來，

也算是古怪又難忘的經歷，

我才知道原來我骨子裏的EQ可能高過老公~XD

住有味日式公寓，畀錢都買唔到呀呢個Plan~嘿~

Day 2，鎌倉~

行程精彩緊密!!!!