新婚人妻玩鬼馬，
為咗部署老公今年的生日節目，
我早兩個月已經開始籌備，
話佢知，我會帶佢去整Macaroon~(噗)
佢早一晚就問定幾點響邊整，
我話約咗1:15pm，亞士厘道附近~
點知壽星佬貪靚又姿整，搞到12:45pm先出到門......
有人仲心急過我驚遲到，話不如截的士去(哇)
上車後，我叫司機去i-Square，
呢刻主角仲未知自己根本唔係去整餅XDDD
落咗車，我話仲有時間不如入半島兜個圈(嘿嘿~)
佢不虞有詐就跟我行，
行行下我帶咗佢入電梯，佢就問：其實我地去邊呀？
燈凳~~等老婆帶你去嘆個半島Spa啦﹗
第一站：維港海景池畔lunch，爆唔爆先？XD
頭盤：香煎帶子配田園幼葉伴橘子汁、大蒜薯蓉湯
主菜：橄欖油浸煮蘇格蘭三文魚柳伴鮮茄欖油汁
意式糙米及野米飯配丫枝竹
甜品：柑橘沙律配薑清湯及血橙雪葩
鳳梨薄片配蘆薈及椰子雪糕
泳池好大，但室內溫度熱到我想跳落水@,@
不過坐位好舒適，好悠閒，環境亦好寧靜，
唔講醒唔起自己真係響尖咀~
食飽飽，同老公走咗出去吹吹風、看看海，
哇好寫意呀~~~~
冇諗過半島初體驗係咁豪XDDD
但請老公來體驗佢未試過的體驗，值晒啦~
1:15-2:45pm Poolside Lunch
醫好個肚後，就獲安排去到私家套房浸摘咕池，
有1小時任浸任蒸任焗，
設備配套完非常完善，你見到乜，乜都可以用~
一入門口睇到呢個按摩池，真係心花怒放﹗
仲要望到維港對岸無遮擋，
真係一生起碼豪幾次.....
可惜只有1小時享用，都唔知玩得乜，
老公影完相即刻洗頭沖涼兼跳入呢個池按摩，
放棄了蒸焗五花腩~XDD
咪講笑，個池大到可以游水咁滯，唔靠邊真係成個人跣落池底
好正呀~~~~~~~
其實浸得半個鐘都已經夠皮，
二人世界談談心，浸浸浴，
確係可以叉足電~
雪櫃供應飲品6支，畀我任飲都飲唔落，
即管試咗支椰子水，幾好味~~
玩到3:45pm，就Ready等按摩師來接我們去隔離做按摩~
全程1.5小時，同你由頭按到落腳趾尾，
真係好爽、好爽、好爽........
所用的香薰油ESPA都係半島出品，
開始前按摩師會簡單問你幾條關於身體狀況的問題，
仲會畀你揀不同香味的香薰，
完成後仲會建議你如何改善生活保養身體~
聞說半島Spa好出名，試過之後覺得真係堅﹗
整體服務我畀9.5粒星XD
我：駛咗咁多錢，今晚返去食杯麵喇要﹗
佢：即係唔去食晚飯嗱？一係我請客啦~
我：嘿，講你又信，你當我流架﹗XDDD
一早就做足功課用埋TableMap訂枱啦﹗
嘆完行過兩條街就有飯食，
我真係應該轉行做Event Planner﹗
冇食過，試新野，
冇中伏，仲堅得﹗
去到簡直如同包場，原本book咗卡位，
但阿姐見我地拎相機，就提議我地改坐露天位~
哇﹗無敵呀﹗﹗咁大個鞦韆卡位畀晒我地，
真係可以一路搖一路食XDDD 好好玩呀~~~~
不過燈光太浪漫，現場暗到我無法影到美食相:P
蒜香魷魚酥，好好食﹗
薄切牛肉乜鬼七味煮，又好好食﹗
石燒豚肉飯，好好好好食﹗
8種魚生的魚生飯，也不錯，三文魚好肥美﹗
最後加個串燒拼盤，燒雞皮同雞肉串都堅好食﹗
埋單近$600，但TableMap訂枱可享85折，
我真係天才呀wakakaka~~~~
老公已經畀我d驚喜搞到成晚四萬咁口，
但唔好意思，你老婆仲有最後一招：生日大蛋糕XDDD
食完飯，返去拎埋個cake先走啦﹗
我一直都話如果我係仔，真係好易冧死女kakaka....
壽星果然有著數，仲有現金禮券毒你去多次，
仲有禮物收﹗
飽到上喉嚨，都要吹埋蠟燭吔個餅先算圓滿丫~~
哇.......我想話個Chocolate Mousse cake真係冇揀錯，好味到喊>0<
我：老公滿唔滿意今日安排？
佢：滿意到爆啦﹗
各位老公老婆，另一半生日你地都識做啦？XDD
沒有留言:
張貼留言