探索堔水埗之美荷樓生活館

黃金、西九、維記豬膶嘔米、明哥、穿珠仔....

去堔水埗你淨係去呢d？你唔悶我都悶XD

話說嘉頓對上的美荷樓已經完成活化好耐，入面的「美荷樓生活館」10月21日正式開幕了，昨日趁放假就專程去看，只能說一句：香港人唔應該錯過。

背景：

美荷樓屬於石硤尾邨，是1953年石硤尾木屋區大火後催生的首座徒置區公屋，見證著香港房屋的發展，呢種「H」形設計的徒置大廈現已碩果僅存，第41座美荷樓已被評為二級歷史建築，僥倖保住條老命被用作公屋博物館同青年旅舍，有展覽、有野食。

 其實未活化前，我已去過一次舊地，拍攝佢爛蓉蓉個樣，

果陣仲畀捐出捐入睇真的住屋單位，正到爆裂!!

 活化咗，新淨又光鮮，展覽部份分2層，話大唔大，細都唔細，都夠嗒既~

 免費入場，入到去記得拎番本小冊子睇下介紹~

Btw，考究唔到呢個設計係咪3D....但幾有趣~

 介紹算仔細，好多極珍貴紀錄片同舊街坊訪問片段，自己一個去都唔會悶~

 愛懷舊的你，見到呢堆展品一定回憶番晒黎~

 呢幅棋，我玩過﹗

下面張棉被，一到冬天就要幫阿嬤響上格床摷出黎，重到爆~XD

 鬥獸棋，我有一排玩得好專業的~

呢d藤籃，我成日叫阿嬤買個用來買餸，因為覺得好grand~

但佢話擺唔到濕野，又掗訂喎....XD

 左邊張蓆我瞓碌架床時就係用佢，好涼爽~

右邊副英女皇郵票，唔知我娘家果幾本集郵簿有冇呢？ 

 呢種滑梯好玩到飛天，牛下都有其蹤影，

但我住的彩雲邨，玩到的是更高的旋轉型，

試過上到去先發現個鐵皮梯畀太陽曬到辣籮柚，落唔返黎要求救......

 呢d圈，連叮噹大雄都係玩佢咋ma XDDD 

我細個成日匿入去狂唱歌，有回音丫ma~

 哇呢隻馬我勁中意騎!!!!!!!!! 可以多人玩到唔駛點爭，其他人幫你屹埋~

 呢隻鐵架我就唔夠薑玩喇，怕落唔番黎~

 呢個瘋狂氹氹轉真係必玩類別!!!!!!!!! 

但我細個手臂唔夠力，試過大哥哥轉得太勁時差d成個飛咗出去.....

 紅A膠拖，但我冇著過~

 呢堆歷史文物我娘家可能仲有，應該捐~

 尼龍床，我老豆有張私家，細細個我就識幫大人「行床」~

行淨一半唔托高，我就會當Sir滑梯咁玩XDDD

 

 呢款鐵架，我就夠膽爬喇，以前d細路玩到咁癲，地下都冇墊板，又唔見我地死......

而家d遊樂場真係唔夠刺激:p

 生活館內有微小模型，做番以前單位實況，連光管都有!!

 橡筋繩，我識玩但好少玩，因為記得有個靚女同學玩到跌甩咗個下巴要聯針，驚驚唔玩了~

下面支槍我仲識摺!!

 以前老師玩體罰，父母心痛都只會暗自落淚，

而家？鬧到你老師跳樓都得~

 模型好精細，睇到津津有味~

 以前的公廁，就係咁簡單？

 展館展現番d單位出來，好有趣~ 

傢俱全部都係堅野，由街坊捐出~

 住過屋村的人會好回味~

 痰罐，我用過，但唔係呢款~

左邊罐柯華田，經典呀!!!

 哇呢對拖鞋都係堅野？

 個雪櫃好正，塊鐵板我屋企都有，
多人來屋企食飯就會擺上四方枱變大圓枱~

 呢款遊戲，我卻是零印象..........

 想去的話，記得逢星期一休館~

 美荷樓內仲有間好型的呼吸冰室 (Full Cup Cafe)，設計一流!!

 到處有靚到爆壁畫~

 行累了，叫個High Tea就可Hea好耐，

食物唔平，但呢個西多只係25蚊，勁多人叫，仲好巨型!!!!

 多謝老公戚起條筋話要來~ 佢的癮仲大過我~

 記得留肚來，食埋lunch都得!!

 逛完美荷，順便去埋隔離JCCAC啦~

滿足的一天!!

我影的相絕對係當中一小部份咋，

最精彩都係屬於街坊的舊故事。

原來名導演吳宇森當年都係住石硤尾，已打算同家人移居台灣，

點知一場大火燒晒佢d家當，迫住冇得走，

最後成功響香港出人頭地......

記得嗒晒d故仔先好走，

睇歷史唔係靠相機拍拍拍，用心睇啦!!!!

包你回味無窮~~