久遺兩年的大阪，我又來了~~
復活節，機位緊絀貴到飛天，
幸而今次打算住民宿，慳番筆~
第一次搭凌晨機，當日仲可以放工後返歸拎行李，嘿﹗
上機前，食番個糯米雞夜宵，
夜機最大缺點係乜舖都閂晒，食都冇乜得揀.....
另一個壞處(對我來說)，竟然係食雞到無倫飛機餐，
搞錯，我畀成八、九千蚊機票只係畀盒麵包我........
我仲同老公講：頭盤嚟咋？
佢笑咗.....
好唔滿足囉，嬲嬲地食完瞓覺~XD
原來我帶咗頸枕，真係可以瞓到天光，正﹗
哇~~~日出呀，爆靚呀!!!!!!
落機了，我成個都好精神，到著時都只係6點幾.....
旅遊服務台未開，但餐廳有開~
大阪第一餐，由早餐開始，我選了B餐~
煙肉+沙律，仲有咖啡，超好味﹗
邊食邊排隊買Pass，關西三日乘車券，
可以不連續使用，限期內任何日子皆可，
但當日一用就當一日計，全日任搭，JR除外，超級方便~
但事前最好計算自己係咪去好多地方會回本先好~
出機場即用，呢程都抵晒~
今次選了位於石津川的民宿，
距離機場約40分鐘車程，好快就到~
估唔到香港熱到爆炸，日本仍凍到痴筋~
在車站打電話給民宿負責人，他們會派人來接送~
由車站到民宿的腳程只係5、6分鐘，行兩個街口就到，
超級方便，
我們選了二樓的細房，足夠兩個人住~
真係有叮噹床XDD
但我們用來放行李，因為喼不能放在榻榻米上啊~
窗外景致尚算開揚~
入屋後必須換上拖鞋，去廁所有另一對，
入客廳亦要除鞋~
其實揀二樓有點捉蟲，
因為條樓梯近乎直角咁陡峭，
抽行李上去還可以，最擔心係最尾一日點拎佢落嚟......
真係自己都未行得穩@,@
搵民宿時得知附近有溫泉，
當日就請屋主指點路線，叫他畫了個超簡單地圖給我，
他還送了我們優惠券﹗咁又慳咗200幾yen~
民宿間隔好骨子，睇下個廚房，
可以自己煮食架~
廚櫃入面的碗碟仲甚具和風味道，超靚!!!
需要單車可隨意外借~
呢間就係我地的民宿---桃子媽媽的家(D館)喇~
相信好多港人都唔會陌生，
台灣人更熟，
因為係由一名台灣婦人開設，她嫁了過日本，
就開了民宿，方便接待中、港、台旅客~
溝通到，冇問題，十分方便﹗
卸下行裝，就出發去玩，都只係早上11點左右~
石津川去難波大概25分鐘，
不過要轉一次車，
呢個係細站，點都要搭一次普通車，才可轉快車~
輾轉下來到日本達人介紹的扇町~
呢度同樣有條商店街，
但特色係唔會撞到香港人同強國人，
行咗半日真係一個都冇，
完全融入歐吉桑與歐巴桑的世界~
而且，消費比旺區更平﹗
兼且滿街充斥著昭和年代咖啡店﹗
我對呢類凳仔有情意結，奈何每次都係外地看到買唔到，
點拎呀？嗚~~
行咗兩條街，是時候醫肚，
最後選了老公至愛咖哩飯﹗
對於咖哩拼漢堡扒，佢真係食極都唔厭﹗
我又何嘗唔係對豬扒食極唔厭......XD
話說回來，你有冇食過咖哩飯真係用咖哩飯？
唔係白飯呀﹗
呢餐咁豐富，共計都只係1,760yen........(港幣$120咁上下)
平到呢..........
仲有好多選擇，不過呢碟KO咗我，
飽到我掃唔到街了~
又係可愛小凳子﹗好想買啊~~~
咁靚的飯盒做緊特價，我影咗當買咗，
真係算忍得手.......著實有點後悔~
邊閒逛邊發掘小區有趣店子，
呢間好野，專賣二手懷舊物，
影完呢張相，我就買咗200yen上第二件紅色衫......10幾蚊!!!
睇見d招牌就開心，好似走進時光隧道一樣﹗
查實呢度叫天滿市場，有九萬幾條街，
佢的天神橋筋商店街全長足有2公里﹗
乜鬼都有得賣~
呢d.....公仔，好有氣勢~
夜晚望到都幾驚......XD
如果你中意懷舊，呢度一定啱你~
但希望下次再去同樣唔會聽到廣東話同普通話~
行過順道看看天滿宮~
好悠閒，但冇乜特別，我對寺廟並不特別鍾愛~
都係把握時間入番條街繼續逛，兼搵路走~
識買和服，梗係揀呢d老店~
行到3點幾，轉移陣地去天王寺﹗
呢隻野，話摸佢腳板底會全家都好幸福喎~XD
呢條同樣係懷舊街，
有時間的話應該嘆番杯咖啡﹗
好多阿伯捉旗，成為遊客鏡頭焦點~
遊客.......對，呢度就周圍都係遊客喇~
轉出大街，感覺好色彩繽紛~
仲有好多野食，一大班人來啱晒﹗
又要摸下腳板底~
後面就係通天閣喇~
好熱鬧，影相靚，夜晚亮燈後應該更靚﹗
通天閣要畀錢上去先睇到風景，
唔畀錢，就落地牢手信街啦~
細路仔天堂~
有得蓋印仔，好彩有簿仔~
呢d卡通果然對我起不了作用XDD
趕住買手信的話，可以放下血~
杯麵幾別致，但我唔想拎，仲要鐵罐﹗
但呢個芝士杯麵似乎幾好食XP
哇好貴喎~
返上地面，又一條商店街，
走入呢區，與剛才五光十色的街好有對比。
全條街都好靚好少人，
有些店舖甚至見唔到有人看舖@,@
呢d男孩子至愛~
懷舊玩具店~
睇下，呢度一樣睇到天王寺通天閣，
但係咪灰晒呢？XDD
不經不覺已經行咗一個站﹗
天黑了，係時候食飯喇呱？
回程路上，計劃晚上去泡溫泉，
為免太飽，決定去便利店買輕食~
每次來日本都要Chur飲品，求其一款都咁好味﹗
咬兩個飯糰，解決咗餐下午茶先XD
全屋得我地兩個，響飯廳食食下野，
走去八掛日本家庭個雪櫃XD
好多肉啊、餃子啊，好想食啊~
仲有好多蔬菜，果然營養均衡~
休息一陣，大約7點幾就起程去溫泉，
民宿叔叔話路程大概6分鐘~
結果我地摸黑又迷路，
最後用咗25分鐘，原來.....
佢所指的6分鐘係以踩單車計....@,@
他說這個Super錢湯係男女分開泡，
人人都要剝光豬，
仲叮囑我地乜都唔駛帶，淨係拎條毛巾去好喇~
仲教埋我地入場後要先把鞋子放入locker，
再去櫃位畀錢拎locker鎖匙，然後除晒，再去洗澡，
再約定一個時間出去會合。真係好詳細﹗
可能去gym慣咗，心態上又覺得冇人會理你，
又冇同朋友一齊，即使赤裸裸都唔覺尷尬，
反正個個都係赤裸裸~
幾好玩，感覺好free，唔著衫周圍走真係無拘無束，
結果我試晒溫泉入的所有湯，
浸到我開始覺得心跳加速同紅都面晒~
我就知應該要撤退﹗
其實我想泡溫泉的一大目的，
係想飲冰凍牛奶......XDDDD
真係難以形容咁好飲﹗﹗我連個吉樽都帶埋返港......
呢間錢湯營業到凌晨3時，
比多d錢可以上樓上按摩、玩其他蒸燉焗~
我諗我地係唯一兩個外地人，實在太正﹗
泡完9點幾，晚餐冇著落，
幸好溫泉內有餐廳，供應的食物係平民價﹗
呢日無話可說，地道到不行~
拜拜了溫泉，我怕熱，
都係中意游水多d XDDD
不過浸完真係超舒服，下次有機會再去，
我唔會咁chur架喇....我驚泡到中暑:p
是日戰利品，Vintage三件，
三樣東西加埋都只係1,500yen.....港幣120元不到，
啊~~~~~我暈了~
開心到暈，Day 2再續~
沒有留言:
張貼留言