2014大阪民宿之旅Day3---奈良、難波、道頓堀

第三日，精神飽滿去奈良，睇鹿仔﹗

出發前，

預咗時間到民宿車站附近的咖啡店食早餐~

跟遊客區的分別是，

呢度絕無滲入識講英文的日本人，

亦冇提供有英語指引的餐牌，

地道到不行，勁Like﹗

不過因為咁，我地就盲中中坐咗入吸煙區XD

隔離位個伯伯仲好好人咁拎起份放響位的報紙，

讓座畀我地~

早餐清一色500yen份，

分別為多士餐、三文治餐、熱狗餐~

好鬼吸引﹗

我選了多士餐，烘來的兩款多士都係超級好食﹗﹗

另有炒蛋、火腿、水果同一堆生菜，營養的確好均衡~

但d菜口感好奇怪，又冇味，畀我遺棄咗~

 老公選了熱狗餐，睇落冇我果個咁吸引hoho~

但呢隻原來係炒麵熱狗，睇圖真係睇唔到啊~~

 兩個餐都好豐富，好美味，不過真係得7成飽~

配埋咖啡或茶的~

 為精彩一天揭開了美味序幕~~ 

 食飽立刻起程去奈良，

車程大約花了個多小時~

出到地面，係個好靚的車站~~~

 影相之餘，記得去旅遊中心拎番份地圖~

  呢日的計劃，係食咗晏先~XD

 穿過商店街再捐番出露天商場~

 呢個場好多野食，離車站只須行3分鐘~ 

 今日，我地特登去豆腐盛宴~

響日本搵食最好之處，係唔駛等即有位~

因為當地實在太太太多食肆選擇......

我揀咗個櫻花季節限定套餐，

老公揀咗個更貴的全豆腐餐~

其實上到桌，已經分唔到邊set打邊set~

一齊食啦﹗

 豆腐宴厲害之處，是菜式數量多到數唔清....@,@

 每樣幾啖，但都可以食到你飽~

 師奶角度：哇，洗碗果個就慘.....XDDD

 迷你豆腐火鍋，配豚肉~

有我喜愛的刺身﹗冰凍鮮甜~~

 呢個炸魚冷麵超美味﹗真係兩淡KO咗~

d麵係櫻花色啊~~~ 

 燒筍同蔬菜~

 少不了天婦羅，好脆好鬆化~~

 仲有沙律呀、漬物呀咁，

唔夠飽咩？食埋呢個釜飯真係捧住個肚﹗

 臨尾仲有紅茶同自製雪米糍，

軟糯到不得了啊.......櫻花味XD

咁食法，都係大概400蚊港紙...........抵到叫﹗

食飽出番路口見到檔夫婦饅頭，

但真係吃不下了，我中意呢d小檔子啊~

 

極速起程行公園，由興福寺行起~

一入去，就見到大量櫻花~

其實櫻花係咪分好多種類呢？

  我唔識分，淨係覺得靚就夠~~

 轉個彎去到五重塔，開始見到大量鹿仔~~(心心眼)

 我地沿住條路一直行上奈良國立博物館，

數量亦變得更多~~

你睇呢隻幾悠閒，坐坐下仲有隻烏鴉飛埋身XD

 真係fd底到不得了，好搞笑，

原來隻烏鴉係挾佢d毛，

看似同佢清理，但我覺得佢係想拎d毛去築巢XD

利人利己啦~~~

 一路忍手到見到婆婆擺的檔，

我就出手幫佢買鹿餅喇~~

 老公一到手就影張相先，

佢唔知已經有好多鹿睇中咗佢....XDDD

 一影完，嚇到佢彈起，笑死我~~~~

 一排有10塊，好抵玩啊~~

 餵到佢不亦樂乎呀~

鹿仔為食到好似我地屋企d貓見到罐罐咁XD

 我影完佢，換佢影我~

 忍唔住手要掃佢下巴，好可愛呀呀呀呀~~~

 掃到佢舔晒脷，好過癮~~

 鹿仔竟然自己埋嚟嗲嗲，捲住畀我攬，

冧死我喇~~~~

真係不停狂說卡娃依~~~

 見有餅餅，即衝過來XD

 大頭鹿Q爆，謀殺SD咭呀.......

 影夠玩夠講拜拜，即刻要奔上奈良公園，

沿途見到我本來想食的奈良知名釜飯志津香~

好彩冇食，原來咁遠，

聞說唔係11am去排定隊，就唔駛食了~

 貼心餵鹿告示牌~

 呢日本來有毛毛雨，但好彩一直冇落大~

 行斜路上去都要10分鐘，終於到喇~

有懷舊手信街~

 哇哇哇，呢度先係鹿群眾居地﹗

老公又畀鹿圍XD

 我地特登揀鹿BB來餵~

 

 

 鹿屎呀~

 睇下佢，幾得意﹗﹗>.<

同我d女好似呀haha~

 點解d鹿唔會走去搞阿婆....d餅，

但又識瞄實d遊客呢？

日本人都餵到投晒降~~XD

 鹿+櫻，好美啊~~~

 行寺興趣不大，但順路走去望下~

毛毛雨後，空氣仲清新~

 

 

 漂亮的鏡湖~

 兜個圈，時候不早，買完手信就沿路折返，

落返去睇猿沢池，被喻為奈良八景之一~

 入池前遇見楊貴妃.....櫻~

 

 猿沢池流傳著七不思議事件.......呢個Topic啱我XD

池邊石碑話佢「不清不濁、不出不入、蛙不叫、藻不生、七分是魚三分是水」
講到好玄，但親眼睇到你會明~XP

每年4月17日都會放生鯉魚，中秋仲有采女祭~

有龍舟﹗場面應該好壯觀，好想看啊﹗

環繞猿沢池四周，都係商店街，
求其走都行得番出去搭車~

喜歡日本的渠蓋連設計都咁用心~

唔中意大路野的我地，
又專登去咗勁懷舊的奈良町~
呢度都有賣Vintage服飾的店舖，睇到我唔捨得走......

轉轉下，入咗呢條西寺林商店街~

好清靜的地段，有Cafe、有畫廊，有好多手作店~


愛貓者，見到呢間一定發晒癲~~XD

淨係個門口就夠我地喪影~

好多貓手作啊~~~~~

實在有太多貨品選擇﹗
最後我揀咗小小擺設同一隻碟~
前年去泰國買果d......都未擺得晒出來>.<

放完血，行番入商店街，
邊逛邊行番去車站~

又見到超靚手繪碟﹗﹗

冇地方擺，又唔想拎，係令我冷靜止血的良方XD

呢個飯盒製作工具組，
令我想起大學同學Candace﹗
嫁咗畀日本人的佢，日日都整出超靚日式便當畀兩個女帶返學，
仲勁到開班授徒﹗好想學啊~~~~~~
強勁推介你入佢fb睇：
https://www.facebook.com/candacemama

行行下見到間影相舖，有呢種服務XDDD
駛乜化妝影唧？

早已打算去奈良一定要食杮葉壽司，
但中午又食咗豆腐宴，
途中又唔想拎，
我就決定如果搭車前再見到，即買﹗
結果我真係見到.....XD

唔食後悔，飽死都要食﹗係得奈良有咋~~

順便買多個梅子啫喱~

特登預留時間去難波吃喝~

到達後先去老公期待已久的Big Camera，

佢想買鏡頭好耐.....

可惜吉手而回，因為冇貨XDD
不過我就即興睇中隻錶，老公送畀我hehe~

出番道頓堀，老公想食一蘭，
香港果間我地從來冇食過，
因為我的搵食中指係千祈唔好叫我趁墟排隊食品牌野，
去到日本都要排？拜拜~~
所以，老公次選係金龍~

又係排晒龍，但冇一蘭咁離譜，
勝咗得一個選擇，價錢超平~
但要屈住坐，我覺得好麻煩，除非我踢拖去啦....

唔好食，又唔難食，
但坐響條充斥住港人同自由行的街道旁食，真係食到我背脊骨落.....
所以我比老公食得更快，
卒之迫佢10分鐘食完閃人，
佢連上fb check-in都check唔切XDDD

掃街先係我Style﹗我一支箭衝咗去買章魚燒﹗

成條街咁長，我揀咗間最地踎的檔口仔幫襯~

味道不過不失，但大概係全場最平﹗
6粒只係380yen，其他地方起碼賣500yen或以上~

小店子，值得支持丫~~

大機自拍冇難度，唔係點出嚟蒲呀？﹗XD

食完速閃，經過大阪王將，
見到呢個巨型餃子忍唔住過去八下.....

唔係呀嘛？？200yen有六件﹗﹗抵到爆呀~~~

唔食揼心口，等就等啦﹗
不過等得的都係港人同自由行，
一迫一推一撞我就燥底，
我真係好唔中意道頓堀~
同旺角冇分別~

不過碟餃子好食都不得了...........
香港的大阪王將就做唔到呢個水準喇~

熟悉到爛的道頓堀，
上次同老公去食呢間蟹道樂，
今次唔食lu~

來過都影下啦，情意結嚟既.....XD

高島屋百貨，設計好正~

上次飲咗橙味水，今次試蘋果味，一樣好飲﹗

盒杮葉壽司我留咗來做宵夜，
買完後全晚冇雪過入雪櫃，保存限期都好長，
因為杮葉有殺菌作用，
就算包住魚生都冇問題~

雖然係咁，我都冇打算拎返香港食XD

盒野唔算平，都幾貴，我揀咗中間貴果隻，有兩款口味~
內附薑絲一包，一齊食，喪好食﹗

聞名不如一試，果然美味﹗
之前睇過台灣Blogger介紹，話d飯超酸，
但我完全唔覺，同正常壽司冇分別，
卻多了一份葉子清香~~~
唔食魚生的老公只淺嚐了一件，
其餘半打益晒我﹗肥仔喇今次.....


是日戰利品一覽：
奈良餅餅與蛋卷，鹿仔卡通款式多但要小心揀，
因為總會混入d有A貨feel的小鹿造型=p

貓手作擺設與碟仔，
諗住揀番似兩個女，但唔想一樣，就選了隻黑白貓XD

買畀老豆的手錶，型到裂，香港搵唔到呢d款~~
仲超抵﹗

令人(我)最興奮的手信，零食一大堆﹗

好似狗糧的沙樂美腸，老公飛佛，
好食到買幾打都唔夠派同唔夠食...........

梅子糖，好醒神，有同事喜愛~

扮炸豬扒同魚柳的經典零食，
口感真係好似啊﹗買了超多~~

魷魚絲，口痕良伴~

朱古力飛碟批，好搞笑啊~~~

43yen，港紙3蚊左右啦，好平﹗

 醋漬魷魚，包裝超可愛~~

 吉列豬扒仲配埋沙律醬畀你，吹脹，好笑﹗
仲好好食﹗﹗

呢堆只係第一輪.......
最後果日我忍唔住買多轉XDDD

係咪好想鍊瓜我呢.............
Day 4再續﹗