女人，你有冇落搭？

相信好多姐妹都有做品牌VIP，
VIP身份愈多，代表你好肯花錢響果個層面，
或對果個層面的產品同服務好有需求~

個人而言，美容品牌內我只得Shiseido VIP，
純粹因為年中報讀咗化妝班，需要補給用品而買咗兩包睫毛拑膠，

駛咗50蚊，就畀咗個VIP我做......

仲即時送facial coupon、免費化妝班等~

除咗一支睫毛拑外，我完全冇買過呢個Brand的產品~

 工作令我日日需要接觸品牌營銷策略，

所以明白企業每個舉動的出發點，
我屬於難搞顧客類，唔會因為贈品而動心~

所以我一直冇用佢d優惠，

直至11月頭打來叫我去銅鑼灣上番個免費course，

正因為佢加咗句：「你放心啦我地教學中心唔會sale產品架~」

咁我又即管睇下佢地有乜營銷手法氹到我落搭~

佢地的誠意邀請， 完全就晒我時間，
點知我揀定後佢就話d班已經full咗，
正當我想話冇所謂啦由佢之際，
佢就話：唔緊要，黃小姐，我地會安排導師單對單同你私人授課~
你聞唔聞到一陣危險味道呢？XD

當日準時到達，果然得我一個有獨立房，

其他上堂的人就響課室上~

一坐低，化妝導師就同我洗面卸妝，

簡單了解下肌膚問題，

就開始執藥咁執將佢會畀我試用的產品，鋪晒響枱面曬冷﹗
等你用完後稱心滿意，總會氹到你買番一兩件呱~

導師好有禮貌，解答問題亦冇猶豫好詳盡，

感覺非常專業~

仲會同你傾下周圍有乜好食，平日有乜嗜好，

知我會寫下Blog，亦好free咁畀我狂影相~
流程至此，我都係感覺良好~

所謂化妝班，原來係佢幫我化......？

佢一邊化，一邊教你點化，

如果你特別想學眼妝，佢就最後留番一隻眼畀你跟住佢的成品化~

自從影pre-wedding畀人化到我徐小鳳咁既樣後，

再加埋正式學化妝，

我反而冇咁抗拒畀人同我畫大花面，

因為確實想拆解：點解畀人化親個樣都同平時有咁大出入呢？
專業人士教路下，我真係睇到一個全新的自己~

(左邊)：佢化、(右邊)：我平日自己化
效果好與壞，見仁見智，我老公就對人地化果個讚不絕口，
話真係好似出面d化妝專櫃小姐咁~
於我而言，係既，粉底厚咗、眼眉粗咗、眼線粗咗、胭脂深咗，連個嘴型都清晰咗~

對女性來說，有呢種免費體驗，真係更易引起消費意欲，
就係出於：神奇效果，
令你不禁覺得買晒返去，就做到相同效果﹗

 上完堂，送咗粒餅畀你食~

 仲有sample送畀你~

 我最欣賞係導師最後會寫番呢次你用過咩產品，畀你留底~

無非，等你幫襯時會有番個record，做到服務細心的要求~

 留低寫埋對導師的意見，最後仲帶你兜個圈~

 對方話呢個地方係任何人都可以上來試用產品，

係陳列室，唔會sale野，

就算你睇中有野想買，都要自己落舖買，

付予一個：你入來，唔會掠你水的形象

 

仲有Shiseido甜品買~

 

呢類拋磚引玉營銷技巧，最易吸引心軟的女性，

一來冇女人唔中意著數，
二來女人都好講道義同面子，
你咁闊綽，又氹得我開心，我唔買都唔好意思啦﹗
反正消費一次可以用到幾個月至半年，
食少餐飯買支精華又可以靚，抵晒啦﹗
喂，仲要得VIP先有大量贈品送、儲積分，
花少少錢就可延續呢個尊貴的地位，
唔係唔買呀？

女人之常情，其實冇對錯，

只要你甘心情願覺得冇受騙，失血後依然倍感舒暢，

咁有咩問題呢？

----------------------------

基本上，我上完個course都真係冇幫佢買野~

一個月後，Shiseido又打來邀請我去做個聖誕VIP facial，

今次亦講明係free，但冇加句：我地唔sale野~ 

 起勢係咁打嚟約，我都係女人，都中意著數，

就到時間後我都決定去~

約了某個星期五晚，APM分店

呢次門市敷mask初體驗，真係幾funny~

堅未試過為咗著數而夠膽死坐正門口畀人卸我妝，

仲要坐足大半個鐘做facial，

其實品牌有冇顧下女性的尷尬感受呢？
雖然我笠咗個mask都唔會有人認得出~

Anyway，坐唔夠1分鐘就眼見身邊的VIP陸續落搭大出血，

一千幾百十分豪爽，

面對呢個情況，我冇半分恐懼，
因為答應來果刻，已經預咗佢sale野~
但我冇打算買野~

睇下，我真係望住APM大堂個舞台敷mask架，

個個行入來就兜口兜面睇到，唔會趕客咩？XDDD

總括來說，佢最後都賺唔到我錢：

1)我真係冇需要再買護膚或化妝品

2)我唔會為贈品而買用唔著的產品

3)買A送BCDE，唔係想我要的贈品

4)流水作業式機械化服務，令人滿意度大減

其實對住我呢類非忠實粉絲根本可以慳番成本，
只要你有record睇到我淨係花過50蚊就冇再買野，
就估到我冇興趣用你個品牌，
free完個堂又再送coupon畀我都係冇使用，
你再free幾多野畀我都係做唔到我生意~

對於品牌的豪爽，我係十分讚賞，
誠懇的服務態度，都係難得，
但有時不計成本去吸引客戶，都要講下係咪mask sense，
呢個體驗令我最眼突的地方，
係一晚用咗12款產品響我臉上，
用完我都唔知自己用咗乜，
你想保濕滋潤？佢就二話不說起勢泵多幾泵畀你用到夠~
我用精華頂多泵兩下，佢可以泵夠5下，
難怪佢話產品頂多用兩個月，買多幾支都唔浪費啦~

最後仲有意無意畀你知道：你敷緊塊mask係皇牌產品要賣$160張﹗
你做完唔係唔留低幾両咁Cheap呀？

So What？最後我真係冇買野就走~
呢下先叫真係賺~

------------------------------- 

 我以前唔會花時間登記換免費品，

但學化妝後真係對試用品有需求~

有一期各大品牌都用FB做推廣，

趁機收集數據加大個data base方便日後做大壇野~

不停換取免費禮品，

唔駛花錢，但花時間~

 我反而中意你明推，我自己落搭，

覺得好用，自然自動搵上門~

仲試下玩遊戲投稿，睇下係咪真係堅冇造馬有獎品，

真係畀我贏咗喎~XD

品牌營銷手法，究竟佢贏定你贏？

雖然我冇實質駛咗錢，但開個Blog討論下個品牌，

間接都幫佢做咗宣傳啦，

不論評價好或不好，多少都將個品牌植咗入你個腦~

You are WHAT you buy，

係做非常香港project的浸大學生教返我的：

你為乜而買？買咗真係覺得開心？

「真係好抵呀﹗」咁咪買囉~