2015日本中部之旅 Day4：金澤

24-02-2015 星期二 (年初六) 

經過兩日(第一晚唔計) Full Day鐵人耐力賽之後，

今日繼續挑戰自己的鐵腳、馬眼、神仙肚~

好彩，舊屎Train過唧XD

未夠 8am 就出發，繼續搭番地鐵去名古屋轉車，

呢日我地去金澤，車程盛惠三小時!!!

撞正 返工時間，月台擠迫程度不比金鐘弱~

 今次搭 8:50am 車，非指定席~

 所以我地十分淆底，

話晒都要搭三粒鐘，如果企足全程，

仲甘過金澤.....XD

 提早排定隊，但去到列車埋站一刻，

先見到頭頂個顯示牌講咗段嚇屎人提示，

內容大概話列車去到邊幾個站，

就會有邊幾個車卡分離行駛。

即是話如果坐唔啱卡，可能中途你會去咗反方向~

咁咁咁.......都排到呢度，

雖然有幾秒諗過改去其他車卡排，

但呢個時候最緊要冷靜!!

冷靜d諗下，佢點都唔會響第二個站就拆卡架嘛，

有排啦，入去搵位坐咗先算，

而家先去第二卡，我保證冇位坐~

果然，坐低後Check下車站圖就放下心頭大石，

因為去到金澤，列車都仲要過幾個站先開始拆卡.....

嘿，記住遇到呢d情況，

唔好自己嚇窒自己先呀~XD 

你睇，冇位坐，企餐飽架......@,@

將近 12nn，終於到咗金澤，

JR站內已經有條金澤百番街畀你吃喝玩樂，

有食街、手信店、商店及超市，

我地時間緊迫，都係去搵食時經過順便望兩眼，

可惜啊~~~ 

百年麵包老店DONQ見到的蓮藕蛋批，

好似好好味啊........

但要搵餐正經的食飽飽，儲存呢日需要的體力!!

 壽司、咖哩，可能老公覺得無甚特別，

所以繼續搜索~

最後，我地揀咗間唔算貴又似啱食的黑百合~

 有定食，唔駛煩~ 

 其實我地叫的餐，好似冇啤酒，

但店員一輪日文過後，淨係識聽個Beer字，

咁就同佢講ok、ok啦~XD (唔係點啊？)XDDD

是但啦，飲杯~~~

 對遊客來說，坐到兩個對住關東煮的吧枱位，

真係幾有趣，

雖然初頭因為身上又有大褸又相機又相機袋咁，

覺得好迫好窄好論盡而埋怨咗幾秒.....

但比我再揀，都一定要坐番呢d位!!

 難得身邊全部日本人，

又可體驗我從未試過的用餐模式~ 

菜未上.....睇見面前d美食就流晒口水...... 

聽到隔離位的日本情侶叫關東煮，

但本Menu......完全唔識睇，

同老公商量過後，決定用手指落order!! XDD

(希望不會錯犯什麼規矩禮儀吧.....xp)

然而，有d款式擺得太遠，手指唔夠長~~~~!

結果侍應立刻派人拎咗本中文版Menu出來，嘿.......

咁就易辦事喇~XD  

 勁餓的兩條友喪點晒自己想食的款式，

根本冇為意過件件都係King Size!!

結果變咗一大碗~~~~(之後仲有定食喎@,@)

 食咗先算!

上面呢隻天婦羅雞蛋，好食到撞上天花板!!!

下面的圈圈，叫紅魚板卷，好鬆軟~

呢個，炸豆腐丸子~

 鬼咁巨型仲叫咗兩個......飽到癲，

但好好好好食!!!!

 大根，入味到不行，非常香甜，一咬即化~

 至於定食，我地未決定叫關東煮前，

都係揀咗最平果個牛筋鍋定食，只係820yen，50幾蚊港紙!!!!

不過佢之前嚟錯咗個岩魚塩燒定食，

睇番餐牌原來果Set真係送啤酒的，唔怪之佢畀咗兩杯我地~

有冇收番酒錢？老公事後都冇check番lu~

 查實食完碗關東煮，我已飽咗七成.....

 好彩呢砵牛筋的份量唔算勁 =.="

 凍豆腐加薑~

 呢個南瓜無比敵咁甜同腍，超好食!!

下面個漬物酸的，似薑又好似係大根？？

 少不了的麵豉湯~

 大戰一場，我食到最後真係撐到爆咗句：

我食唔落了，再食我應該會嘔~

老公話：你講笑咋？

佢話佢仲食得落，可以幫我食埋~

輪到我話：你講笑咋？

Anyway，我地冇食剩野呢個壞習慣，

尤其去到日本呢個咁尊重食物，同食物咁美味的地方~~XD

 時間比金錢更重要，

呢餐竟然食咗我地1.5小時!!! 

速速起程遊玩去~~~~

愈急愈行錯路，

行咗去買車票的反方向位置，

唔緊要，當睇多d野囉~

 呢幅壁畫超美~~~

 行番去啱的東出口，來到東廣場，

會見到金澤站最著名的「鼓門」和玻璃天幕，

傳統與現代設計融合下，

成為全日本最大的鋁合金建築「Montenashi Dome」!!

文末會再介紹一下~

 

 出咗車站要先去「北陸巴士鐵道中心」購買一日乘車券，

沿途會經過金澤站一帶最大型的商場Forus，

愛名牌的人不妨去逛逛~

 售票中心很易找，東口一出轉左見到Forus再轉右直行一個街口就到~

 今次我們會在金澤中心地帶遊覽，

沿途要靠搭巴士，

巴士一程收費大概200yen，

一天任坐乘車券500yen，仲可以坐古董觀光車，

梗係後者著數啦~

 出發前預算一下自己會去多少個景點，

如果只去一個，來回兩程只須400yen，張券當然唔抵，

但我地呢類毅行者.......點會只去一個地方咁少XD 

出番車站，就響Forus商場對出，3號位~

見條龍咁長嚇左一嚇，

但佢地應該唔係遊客，似係有活動要去~

望一望排隊位置，果然有呢條周遊巴士專屬等候區~

約15分鐘一班車，等了一會就到了~

 上車唔駛畀票，落車畀司機望下就得~ 

只想坐一程也可以，都係落車入錢~

 架車會環繞特定路線咁行，就係一個圓圈咁，

不過佢會分向左駛，定向右駛，

所以上車前要留意你的景點方向，

車身有顯示，車內也有提示牌，十分清晰~

再驚的話就望下地圖啦~

 坐咗十分鐘不到就落車，影下架車先!!

下次坐的可能唔同款架喇~~

來金澤，係因為我同老公都愛懷舊，

金澤出名新舊交融，既有傳統味濃的茶屋街，

亦有好前衛的21世紀美術館，

但取捨過後，先不去後者了~
還有購物地帶香林坊也沒有去~

 第一站：東茶屋街

充滿和風情懷的街道，有京都祇園花見小路金澤版之稱~ 

其實未到，我地仲係響外圍，

反正整個區域都古色古香，邊逛邊找沒相干~

 去案內所借廁所~XDD

 比人參觀？定用來搞活動呢？

 東茶屋街小模型，還亮了燈，好靚~

 呢度d屋都係建於江戶時代~

全部都係兩層高木造小平房，不少已有近200年歷史!

 店子還在經營的，沒有被荒廢~

 

 理髮店什麼都有，

但感覺似去咗電視城 @,@

好靜好靜，但卻真有人在居住~

 

終於走到內街，第一間遇上的店子就是「箔一本店」!

簡單講兩句歷史，

現在全日本生產的金箔，有99%以上都來自金澤，

皆因16世紀末在統治者前田家的招攬和獎勵下，

引得不少製造金箔的工匠到此聚集，

當時大部分的金箔工藝亦流傳至今，

把我銀包殺個片甲不留的箔一，也是生產商之一 XD

本來覺得金好娘的我，

一見到店內的金箔產品卻又心心眼~~~

金箔護膚品、化妝品速速試!!!

掛住試亦唔好意思周圍影，所以無法比大家望下入面的環境~

但呢度確係買手信好地點，

金箔朱古力、金箔軟糖、金箔掛飾、金箔餐具......乜都想買!!!

好彩(定唔好彩)可以簽卡，所以唔駛就住買~XD 

哇哇哇!!!!!!!!!! 咳死我都要食呢個奢華到痺的金箔雪糕!!!!

450yen，平過海港城杯抹茶雪糕呀陰公唔食就笨~~

金箔的確係冇味，但金箔雪糕呃 Like一流!! XD

老實講，個牛奶味超正，打咗個好好的基底~ 

 老公已響外面行完一轉返嚟催促我 XP

買完喇買完喇~~

一行出去，見到上面呢座野，原來係自由軒~~~

大阪好多人排隊食果間咖哩飯啊，

呢間1909年創業，有100年歷史喇!!! 勁呀~

終於來到真真正正的東茶屋街!!!

 哇啊好靚呀~~~~

 說不出的喜歡~

 當年的達官貴人要消遣宴會，

就係來呢條街，因為呢度有好多高級料理~

如今，呢類食店僅佔商店街小部份來主打遊客生意，

有些古屋就改建成展覽館供遊客入內參觀~

 藝伎表演，希望有機會看一次~

 

 

 

 

 

 

 

 

親身來逛一圈，你才會嗅到古舊氣息~~~

 化妝理髮店，連婚禮造型都包埋，

呢個門面我超喜愛~~~

 就是覺得好美的海報~

 出番茶屋街真正入口，見到呢間烏雞庵，

聽聞是賣著名雞蛋糕的，也有金箔雪糕賣，但賣700yen~

 真係有烏雞標本@,@

轉出路口去下一個景點，

冷不防遇見令人融化的柴犬!!! 

 Cute到不行，仲識笑~~~

連只愛貓的老公也被其臣服 XDD

 回到剛才下車位置往前走再過馬路，

斜對面的就是我們的第二站：主計町茶屋街~

 沿途會看到淺野川~

 下圖這個就是全景，我們要走進去嚕~

 除了東茶屋街，金澤還有西茶屋街和這條主計町茶屋街，

是現時國家重要傳統建造物保存地區!!

 這個茶屋街沒有很熱鬧~

 街道比較窄，也沒有什麼商店可購物~

 感覺更似走到別人的住宅地~

 其實也是有食店在經營的~

 

 同樣有我很想看的藝伎表演~

 

主計町案內所~

 

 很快逛完，

來看的原因是位置較近，不用花時間搭車再找，

在有限時間看最多的景點，就要編排和取捨一下~

 找到小公園~

 

 狗狗在散步~

金澤渠蓋~

 

 主計町的晚上才最熱鬧，

因為河邊一列都是食肆，晚上亮起燈來一定很好看~~

 

 是入口，也是出口~

走了，後會有期!

第三站：兼六園

要坐一程車，幾個站而已~

 下車後就看到有500年歷史的金澤城公園....外皮~

 撐了長長的樓梯，再過馬路，就是兼六園入口~

就在金澤城公園對面喇~

 向左望，也是商店食店林立~

 

你有沒有看到筋皮力歇，比我們還累呢？XD

兼六園入口旁邊的手信街~ 

 抓緊時間，先入園~

 

 

 第一印象，這裏是個很大的公園~

 大到每個景點都行餐懵，

老人家日日行一圈，保證強身健體!!

事實上，兼六園好巴閉，

是日本三大庭園之首，

其餘兩個分別是岡山市後樂園，及水戶市偕樂園~ 

但三者之中，兼六園名氣最響，入場人數最多，

也是金澤市的傳統景點代表，連市民都引以為傲~

 園內面積達10萬平方米，建於1671年江戶時期，

後來經多次擴建，

方由金澤城的外圍庭園成為現時知名的兼六園~

 Enjoy寫旅遊Blog，

是因為可與朋友分享旅遊經歷，自己也能回味一番，

而最令我意想不到的，

是能夠藉著翻查景點資料，

而重新認識曾經去過的地方，甚至對這個地方加深了解~

(於我而言，出發前著實不會費時去看景點的歷史背景!! XD)

 不找不知，
兼六園一名竟是取自中國宋代文人李格非所寫的《洛陽名園記》，

文中用了六個形容詞去形容洛陽湖園之美，

「宏大、幽邃、人力、蒼古、水泉、眺望」

日文人認為(？)呢六個特色正好與兼六園特色相近，

所以取名兼六園~ (咁都得？)

 眺望台~ 乜景都遮晒 XD

 景色又的確好美~~

 

 

 Um......見到呢個像果下，

我腦子不受控地褻瀆了神明...........

因為我諗起曾志偉....@,@

 Sorry Sorry，佢係日本武尊之像，

我當場真係有合掌拜拜Say Sorry架.......XD

 周圍行下，見到有日本導遊向團友講緊呢塊草地~

係特別青翠的綠!!! 刻意圍住咗，卻又冇介紹牌噃~

非常翠綠~~

 行行下見到有棵粉紅色的花，

愚昧的港燦就興奮地認為佢一定係櫻花 XDDDD

仆埋去影完相後先發現，原來係梅花.....

 都靚~

不過園內真係好似有初櫻，

只係我影咗一次粉紅色後就算，冇為意，冇再影，錯過咗~ 

夕陽喇，想起了維園~ 

園內有好多個亭，我唔知邊個打邊個，

唯獨記得呢個時雨亭，

因為有餐牌，有野食，可惜門已關~~

 

 園內開始有廣播，但唔識聽，又冇英文~

加上四周都冇乜人，好驚走晒得番我地未走，

趕唔切出去我會殺人吧.....

 但老公實牙實齒話望過個牌係收六點，

唔駛驚咁話~

兼且仲想睇多幾個景點............@,@

 真係好貪心~

 行死我....

 又上又落，駛唔駛咁大啊個園......XP

 點解次次去親d有野食既地方，都閂鬼晒架？

 

 終於行完，出番剛才見到的手信街，

噢~~~都閂晒~

 五點幾咋喎大佬.......

 時間不緊迫的話，

一日最多兩個景點好喇~

遇見立搶狗？

 

 打到呢度，我記起當時的肚餓~~

 兼六園拜拜~~

 行過對面想踩埋金澤城公園~

 橋上遠望，樸實無華之感~

 喔噢~~公園閂埋喇 XDDD

 外面影下啦~

 望番去兼六園入口~

 一左一右冇甩漏~

 日本好多公園、設施、朝市的開放時間都有分時令，

因為仲係冬季，所以公園早一小時關門，

旅遊書冇提醒，我地就預算錯誤喇~

如果預先經過景點，最好望下個牌睇清楚，

唔好靠晒書啊~

好，去第四站：金澤神社~

呢個老公好想去，

而呢個時候明知神社已關門 (販賣部)，

都決定行去兜個圈~

 兼六園對出的路口落斜一直行就到，

逆時針方向繞著公園走~

 

 行到見到日落~~~

 回頭看剛才走下來的斜坡，都美~

 經過石川護國神社，就開始上斜~

都說，我們的Trip是毅行者玩的.....T.T

行了大概十五分鐘就到，但條斜路很要命.....

金澤神社斜對面就是21世紀美術館，已沒時間去~

 

 老公好想來，因為呢度有出名的學問之神~

 佢想求道符返去傍身，因為佢要考試 XD

 

 不過檔已收，買唔到lu~

 唔驚，影咗當買咗，要邊款影邊款!!

原來呢個學業成就符係咁靚!!!!!!!!!!!!!!!!!!!

買唔到，我仲失望過佢.............

有子女的又會來金澤的話，必定要買番個做小禮物!!

 旅行安全符，啱晒我地~

 

 好多選擇~

鳥居~~去京都兩次都冇睇過，呢度睇到微型版~ 

 回程了，繼續逆時針方向兜圈，落斜!

 沿途研究下呢度係咪半山區，

呢度住的人係咪好有錢？

期間見到好有情調的食店~~~

 唔駛諗食飯住，要趕車，搭多程巴士再駁JR返名古屋~

返到金澤站，可以慢慢欣賞番下午經過時冇睇清楚的鼓門!!

鼓門的設計取自能劇其中一個流派：加賀寶生的鼓

鼓門的兩旁支柱就是鼓架，

交錯的木條構成了13.5公尺高的鼓門，

現場看的確很宏偉!!

這一晚，還看到鼓門前有許多人落腳架拍照，

連電視台都有，真真誇張~ 

 最型都係呢個噴水電子屏，

可以變出不同字樣，用水砌成的啊~

 

 

 有三個日本妹叫我幫佢影相，

所以之後也拜託她替我們拍~

 

 

趕搭 6:51pm的車回名古屋，車程一樣三粒鐘~

 一樣非指定席，要排隊霸位呀~

 車上睡死了三粒鐘，

因為太趕所以冇買定野食上車，連廁所都要上車先去~

(還好，廁所很乾淨，每一卡都有)

返到名古屋站，

我竟然PP痕覺得要補食番一次火車便當!! XD

 買咗呢個，貪佢夠多~~ 包裝仲好精美~~

打開~~~有埋筷子、牙簽同濕紙巾~ 

 一共三層，未食就覺得自己好似拆緊禮物咁~~

 揭盅~~~~哇好靚呀~~~~究竟好冇味呢？

 盒一：有鰻魚、蝦、筍、芋頭、玉子、餃子、腐皮福袋~

 盒二：飯，加上味素 (係咪叫味素？？)

都係雞蛋和肉碎之類的味道~

好食喎竟然!!

 盒三：天婦羅炸蝦、炸豬扒、腐皮壽司、炸雞、橙、甜品~

呢個係菇？唔係，係芋頭扮菇，

駛唔駛咁趣致啊？？佩服!!

呢個便當，我比 8分，

除咗炸野凍咗之外，其實都算好好食，

最中意款式多，每樣份量又少少的設計，

無論心靈同口腹都一樣大滿足!!!!

同老公開心Share咗個便當，已飽到冇落街食飯，

反正夜到連山哥雞翼都收咗舖~XD

 坐咗陣，決定去便利店補給~

呢次遊日，我突然愛上三文治，

竟然一眼都冇望過最愛的炒麵麵包!

響日劇《深夜烘焙坊》出過場的生果三文治，

我食到喇~~~貴過有肉的三文治!!

但真係超級好食~~

相比類似的鮮果忌廉蛋糕，以麵包取代又冇咁漏喎~

 走一轉，買咗呢d~

芝士獅子狗、莎樂美腸，無敵好食~

 前一晚買咗一條試，

試完即刻決定買來做手信，實在太好食!! 

(究竟我有咩話唔好食............詞已窮)

 名古屋版雞翼味Jagabee~

便利店版暴君、薯片熱氣野各樣~

 四日夾埋的零食存倉~

 在東茶屋街箔一入手的東西~

金箔護膚品旅行裝，

一Set可試齊各樣，一口氣買了三Set，作為手信也不錯~ 

金箔面霜，回來後十分後悔沒有買多盒，

因為為起不到港紙200元，哎呀~~~Orz..

但不知何解，不少朋友聽到這種金箔護膚品會想到有沒有金屬成分 @,@

我真的倒沒想過啊.... 

 金箔朱古力、金箔軟糖，

朱古力好味!! 軟糖還未試~

金箔匙扣，買了兩個，

一個送老豆，一個送老公~ 

 綿羊手機繩，

羊雕得好精美，羊抱著的水晶球也注滿金箔，

靚到一見鍾情~

Chur爆第四天圓滿結束~

回酒店前順道在藥妝店買了幾塊浴鹽，

要洗洗疲勞去~~~

Day 5，係最舒適的一天，

專注在名古屋市遊覽~

還有個女僕Cafe初體驗，好笑到碌地......

密切留意 :D