馬拉松二年級生

點解臨老先嚟學吹打？

唏，跑馬拉松係冇分年齡既﹗

不過推動到我參與，

係因為上年結婚前減掉十幾磅，

覺得自己身輕如燕咗(少少).....就跟老公走去跑~XD

信我，只要你跑過一次，

堅係會上癮，因為跑完果下你會覺得自己突破咗(少少)，

果田火.....爆呀~~~

先講下今年，由比賽前一週拎包包，

天氣已經好惡劣，

氣溫急降至個位數字，仲要落雨..... 

成個星期check住跑果日究竟要著乜應戰。

下面呢個小丑話響終點等我，我叫佢一齊跑，

佢話：你唔係認為我咁既身世跑到下哇？

XDDDDD 我仲以為佢係鬼佬~

 兩年都報10公里5組，因為8am先起跑，

唔駛倒屎咁早起身~

不過對比上年，今年大會安排差到無倫﹗要鬧﹗﹗

搞到我都冇心情冇時間去影相~

話說：小冊子表示今年去寄件只限由銅鑼灣出發，

(我上年係天后出發，前年陪老公來都係天后﹗)

點知去到皇室堡對面的IKEA個燈口位，

就因為半馬跑手成棚響馬路跑緊，

而令警方要間歇性放人過馬路，每次兩個﹗係兩個﹗

成班5組塞到去惠康，

前後等咗十幾廿分鐘先過到，

結果要預賽﹗由皇室堡喪跑去中央圖書館對面個維園入口先到達物品寄存閘口，

點知，渣馬工作人員話已經封咗，唔畀擺野﹗

除咗「頂」呢個字，我唔知講乜好~

最後，冇遲到的5組選手就因為安排失檔冇彈性，

而要「帶埋隨身物品跑足全程」，係咪好爆先？

渣馬有乜可能唔知半馬選手會一窩蜂經過果條路？

佢都痴筋，搞到我地又嬲又無助又要提早消耗體能﹗

求其影番張出發前相，冇喇，真係冇心情，

仲要調整作賽心情~

 

 抽住袋野，跑得好吃力，比去年跑慢咗5分鐘，

呢5分鐘係大會欠我既，哼~

不過今年比上年肥番10磅，又練得果3次.....

跑慢5分鐘真係偷笑喇....XDD(啤)

 今次跑完唔辛苦，冇悴死感覺=P

但跑果陣就好辛苦，起步果時仲凍到流住鼻水咁跑XP

明明知道路綫係點，但硬係覺得今年d斜路特別攞命@,@

仲要偶爾吹陣冷風埋身，對於成身濕晒的跑手來說好易中招~

 老公仍然比我早幾分鐘到，

睇下佢吹到個頭.....XD

嗱嗱淋避開人潮搭飛Van返歸，

回家前食個慰勞茶記，正呀~~

=====================

來看看上年，

拎包包當日天氣很好，直至跑果日都唔錯~

對新手的我來說，萬幸﹗

 我對馬拉松充滿好奇，

係源於老公響2012年開始跑而起，

當年我陪佢一樣咁早起身，

拎埋長鏡去影佢，

睇到現場氣氛咁好玩，就決定翌年參加~

 見到啦啦隊咁落力打氣，真係好有士氣XD

 

 上年仲有呢d公仔，今年乜q都冇~

 前兩次我地都由天后入維園放行李，

睇番張相，6:57am行到7:04am就順利寄件，今年？(又要怒一怒)

其實幾壯觀，好似成堆垃圾咁.....

 

 放完行李行去起跑點，仲見到沿途有人扮鬼扮馬打氣~

 好佩服佢地咁都跑到~

 

 超級多人，個個都精神翼翼~

好中意呢種氣氛﹗

 好彩上年有影下沿路實況，

其實，年年咪又係咁XD

 好多大學派出打氣團~

 

 維園年宵你實迫過，

有冇興趣迫下渣馬？

 行到過晒天后，先到呢個閘口，

要check你號碼布先畀入，

前年我來到呢度就目送老公自己行去起跑點~

 開跑前，都幾耗體力，

不過可以當熱身既......

 

 睇下d人幾冇品，我估都係工作人員居多，

有邊個選手得閒企響呢個位飲紅牛丫~

 真係行咗成公里都未到~

 仲係未到~

 好多人提早上去拉筋做熱身，

仲有等廁所~

 

 第一次跑，心情真係好興奮，

因為未試過嘛~

呢d現場氣氛，唔跑真係唔會感受得到。

 

 見到前面個圓拱型嗎？

冇錯，起跑點係去到和富中心﹗

銅鑼灣行去和富你話預跑(行)咗幾多公里？

 阿老公賽前永遠木口木面，可能佢好緊張，

或者佢好認真XDDDD

 以我呢d重磅肥美身型，

都可以用1小時16分跑完，

雖然唔算快，但唔過個半鐘已經畀自己一個叻~XP

 上年又係返到屋企樓下先食麥記，

11點前有早晨全餐丫嘛XDD

睇下佢，寬容晒~~~

關於馬拉松，我想說的其實是.................

其實，

當我見到連頭髮花白的老人、

戴上義肢的人、視障的人、

甚至坐輪椅的人，都可以完成賽事，

就覺得自己冇理由唔得﹗冇藉口話做唔到﹗

獨自用個人步伐去跑，係個同自己傾偈的好機會，

可以反思，可以期待，仲可以訂下各樣目標，

因為跑步時除咗個腦可以諗唔同事物，

你就冇野做到~

跑步仲好需要意志，我上年跑咗1公里就決定「唔會咁on居再跑第二次」，

覺得自己上咗賊船，但已沒有退路XDDD

不過呢，當跑過5公里而發現自己仲未死得，

餘下的路程就會好有動力去完成，

沿途仲可以欣賞不同穿著的跑手(我有呢舖癮)=P，

仲睇下d女個籮柚firm唔firm(我又唔信其他人唔睇囉)

又會發現到某d人會視你為假想敵，而自己又會去搵假想敵~

10公里唔長，但你跑完一圈後，

或多或少都學識點部署，

例如好多人選擇落斜時狗衝，但我唔會，

一來容易傷膝，二來之後的上斜一定冇氣，

所以只屬業餘的低B班跑手，我會保持速度Keep住條氣，

仲堅持：一定唔會行﹗因為我知自己一行就唔會再跑得郁........

有冇諗過點樣重新認識自己，了解自己？

試下跑步，真係一個好方法~

呢本寫給女生的跑步書，

我強勁推介﹗

作者係呢位漂亮的台灣女生歐陽靖，

係作家，又係model，

佢用自己第一身去講點樣開始跑起馬拉松，

由1.4公里都跑唔到，

但1年後佢跑咗全馬@,@

曾經放肆飲食肥到70kg，

後來又因抑鬱而患上厭食症，

然而因為跑步令佢重生，令佢堅強，

好感動，好好睇~

書中仲會介紹型格穿衣配搭，跑步前後的飲食及舒展運動，

就算冇諗過跑，都值得睇﹗

姐妹們，加油啊，

我做到，你地都一定做得到﹗

2014新春節目大滿足

2014新春放假大滿足﹗你地又點度過呢？

年三十：「團年飯、行花市」

公司例假，陪女玩兼等老公放工，隻豬玩玩下自己定格瞓咗......XD好搞笑﹗

 瞓完呢邊又瞓果邊，爽到呢~~~ 仲要擺d咁可愛姿勢，真襟撈~

 

夜晚同夫家落酒樓食團年飯，食到10pm兩公婆就起程逛年宵，近近地，花墟啦~

平生至怕迫，但一年一次無謂掃興，然而我都一路迫一路覺得自己on居~

順住人潮方向行咗3行諗住返轉頭去小食檔掃街，點知欄住唔畀入返去，

嘿﹗﹗激屎我，即係迫人一入去就食野？嗚~~ 

入場迫咗25mins淨係睇到賣氣球同雞仔餅後就折返，

 唔知搭乜車返歸下，我地揀咗行路，

花墟漫步到土瓜灣僅45mins，

仲口痕買咗個麥樂雞餐+朱古力奶昔開年XD

年初一：「睡到飽、食盤菜」

年三十晚例牌3點都唔瞓，結果年初一瞓到食brunch先起身，

放肆地煎了年糕、蘿蔔糕、餃子、火腿煎蛋，

都係果句，一年一次XD

 食飽同阿女s穿新衣拜年，好啱身呢~

 其實動物邊駛著衫，著完又lam唔到身，

求其著兩下影張相我就被老公同佢地除咗佢﹗

雖然真係好得意XDD

 Miku愈著愈肥，著到成個男仔咁~,~

其實背脊設計好似知客kakaka....

 Nana明顯係貪靚鬼，著完自動波走去狂照鏡﹗﹗

 

 晚上過夫家食開年盤菜兼探佢大大大公主Ceci，

8歲豬喇，雖然望落好大隻，但實質輕磅過Miku，

抱上手就知~

 每年一盤菜，好勁，食極都食唔完~

真係盤滿砵滿﹗

 赫然發現奶奶預備的全盒，

竟然有利是糖同發達糖﹗﹗

勁呀，好Vintage呀XDDDDD

 細佬(老公的細佬)去完日本，

買咗好多好多手信畀兩隻女，發達喇~~~~~

真係錫到佢地燶﹗好開心~

 呢隻典典豬古靈精怪，真係令人成日想捽佢肚腩XDD

年初二：「娘家拜年、飲茶兼重遊舊地」

又係睡到飽，就起程返彩雲拎定位等老豆落嚟飲茶﹗

 以前呢間叫好彩大酒樓，之前已改名叫彩雲大酒樓~

條邨仲有間叫彩龍，細個放學就跟阿嬤去飲茶食晏，

因為彩雲邨係入清水灣必經之路，

所以呢度d酒樓成日好多明星飲茶，

我細個成日搵佢地攞簽名，當中仲有翁美玲、張國榮同周潤發.......

 飲飽茶，由老豆做領隊帶我地細看彩雲的變遷﹗

哇，變到咁靚~~~

 以前麥記上好彩條迴旋路咁就冇咗，

連帶個小型遊樂場都冇埋，

老豆話而家個場地用來擺下展銷咁.....

 哇，好浮誇呀，整晒電梯同玻璃天幕，

鏡頭背後仲搭咗個apple store feel的玻璃屋，

內設電梯落地底~

 以前響地底的百佳搬咗上酒樓下一層(兒童樂園冇咗)

原址就開咗萬寧同麥記，

麥記對出就係巴士總站，呢個幾好，

因為以前未有車想食薯餅就要仆住去買再跑返落嚟，

而家唔駛趕啦~

 個七仔變大咗~

 對面個圓圈，前身係陽光快餐店，

佢的舊址其實就響現時七仔個位，

因為我記得細個曾經響佢門口嘔過XP

佢地的肉醬飯真係好好食.........炸雞髀good good，但好貴~

翻新後佢地唔做了~

 呢條係長命斜，我慶幸自己唔係住到咁高，

落MTR唔駛駁車.....

彩雲邨真係好大架，連曾志偉都響度取景拍賀歲片，

貪佢夠懷舊，

可惜丫，舊野而家都冇晒了~~~~

 原址彩龍，有一半斬咗出去做屈銀子~

 八卦貢入去望下，哇，裝修好閃但空間好細......

老豆話佢d口卑仍然唔多好，仲收得好貴~

 

 領匯下的設計，樓底矮到伸手可及咁滯，

感覺好壓迫、好奇怪，

舖頭d招牌仲假到好似行咗入博物館XD

 舊舖留原址的後果，就係招牌都畀假天花遮埋......

超好笑，呢間係乜？

呢間係德豐文具店........我細細個就係佢客仔~

 東山同友發辦館，又係被遮招牌~

以前d小食攞到出街，好震撼，好中意響度流連揀零食﹗

小學落街玩仲響度借電話打，

我試過打錯電話認錯阿媽添﹗

而家冇晒feel，前面個空地仲變咗大昌......

領匯真係搾人搾到盡，搞到條邨密質質~

 

 我樓下，

細個時成日都期待佢話油外牆，

會諗下佢變咩色，我中意紫色XDD

 樓望樓，我細個冇野做就企響露台望下對面樓......XP

 雖然細個好羡慕人地住大屋住私樓，

但而家就好Proud of自己住過屋邨、響屋邨成長，

呢d獅子山下的人情味呀回憶呀，

冇住過係唔會知﹗

例如阿伯上樓賣衣裳竹、擔住蒸籠賣燒賣粉果、

左右鄰里唔鎖門全部細路通街走、

響lift口玩紅綠燈踩單車中秋玩煲蠟...........

Sorry，而家就算住屋邨都冇呢支歌仔唱喇~

 好少返娘家，多數係約老豆出去食飯飲茶，

所以一返去就尋寶，摷下d得意野畀老公睇~

以前畫的畫，好彩有mark低畫於1995年，珍貴啊~

 我個書櫃仲有幾筒筆，

細個中意儲筆，呢支Betty真係冇得頂，

同會長生得一模一樣XDDD

 呢幾款筆，如果你同我同一年代，

應該都有過幾支吧？

 

 哇，Marroncream﹗

呢隻兔我細個好中意﹗

 捐血獲發紀念章，當時年年都拎﹗

(要反省，好慚愧)

 呢堆勁喇，竟然畀我搵到中學時的學會章，

全部都甩皮甩骨，

原來好多野好好保存，都會自動解體架喎~

 繼續捐血章，呢d每捐一次得到一個，

唔知而家仲有冇呢？

當年好熱血，每隔3、4個月就捐一次，都有10幾次架....

 哇，屐set﹗

好似係小學一年級阿媽買畀我~

 呢d歌你地聽過未？

 阿嬤響牛頭角下邨買畀我的，

古董﹗入面配果塊布都好Vintage﹗

 美術老師Miss Kwok兼契媽親手整來送我的和紙頭飾，

(我諗至今冇人知當年有位老師契咗我做契女XD)

 又係阿嬤響牛下買給我的頭飾，

佢去親都買，我地兩嬤孫一齊響街邊車仔檔揀款XD

好彩我有習慣用一個儲一個，包裝是亮點~

舊畫作中，一睇到呢張即刻叫咗出來：

哇﹗同Nana咁似既？﹗

原來19年前(1995)，我同Nana的緣份已定~ ﹗

拜完年，同老公行去德福megabox逛街，睇金雞sss，行IKEA食CPK，

足足玩咗12粒鐘先返歸﹗

年初三：「人嘻總部團拜」

繼續一年一度大團拜，來我家集合逗利是~

會長真知我心，我最中意食馬卡龍=P

開心一齊Share~

 期間仲整咗IKEA牛肉丸、雞肉丸宴客，

太好味，冇人記得影相XD

 傾下食下就拉大隊落街食晚飯﹗

 經投票下，大家選了馳名土瓜灣的仁沙洞~

 份量又大又抵食~

 冇揀燒烤因為難傾偈，

我提議一人一個餐再加小食~

但已經好誇張喇﹗

 石頭飯、豆腐湯、刀切麵、韓式粉絲、煎餅、飯卷.......

每人都係$115﹗﹗

 食飽飽又拉大隊去759掃韓國零食XD

 返家後拆禮物，哇有大蘋果，足有D級size﹗

勁呀好中意呀﹗

 我d女model出身，成日自動波走埋去擺post屎搶鏡.......

嘿，捉你影又唔影喎~

你地買既野都好好食﹗﹗﹗

(題外話：細個有人來拜年，份禮阿媽實唔畀拆，

話要用來拜年循環再用/口\，

真係好可悲囉﹗原來老公都試過kakaka)

送得畀我我一定自己食﹗﹗﹗點可以易手架﹗

6:30pm就食飯，食飽都未夠8pm，

門外已大排長龍~

證明真係好爆場﹗

 初二去IKEA，買咗張自組小凳，

好有幼稚園feel，買來畀女坐XDD

年初四：「中學同學大大大團拜」

多得花e號召力強勁，今年好人齊﹗

照舊尖東御苑皇宴﹗

 生完好似冇生，真令人羡慕非常﹗

小悠B好厲害，見慣大場面任抱唔嬲﹗

 未生的靚太借咗人個靚仔影相，

呢d先叫大眼仔﹗XD

 堅中意女，睇下幾冧﹗我要女﹗

 足足18人，中同帶埋老公仔女團拜，

hey hey我陣容強大﹗﹗

有望未來兩圍都坐唔晒XDD

 飲完茶，同老公拍拖，

想搵地方食tea但周圍都係人，

行咗去element睇細路溜冰嘆冷氣~

 行到5點幾，半天吊，

究竟食Tea定Dinner？

唔理了，坐低嘆杯mocktail先~

仲點左個墨西哥chips邊食邊談心~好好食呀﹗﹗

 斜陽裏氣魄更壯~~~~XDDD(中金雞毒)

幾浪漫~

 未試過呢間，求其點，

但我一眼就響menu睇中呢個Churros﹗超級好味﹗﹗﹗

其實我唔抗拒肉桂~

 我老公幾勁，用鼻哥窿飲mocktail XDDDDD

 想搵露天位坐，呢度係好選擇~

 我地就係食呢間，蚚蜴cafe =p

 Element好揼本，個黃金馬頭好閃好巨型﹗

 老公唔講，我都唔知佢係用馬仔砌出來@,@

 好浮誇呀........

 呢隻粉紅色玫瑰馬仔，我一見鍾情，超靚﹗

 呢隻都唔錯~

食完個early dinner加逛到飽，

臨返家前都走咗出旺角買碟睇子夜場，

其實我地晚晚都子夜場狂煲碟，

呢晚就睇咗Juno執導果套彊屍，

一個字：睇唔明﹗

(但後來睇埋製作花絮，我明喇.........)

結果我呢晚發咗個同Juno思緒一樣混亂到不堪的夢XDDDD

BTW，我兩個女都有利是收﹗哈哈~~

祝大家馬年行靚運，事事順心﹗

恭喜恭喜﹗